नेपाली लगानीकर्ताले अस्ट्रेलिया न्यू साउथ वेल्सको सिड्नीमा खोलेको प्राविधिक कलेज 'इन्टरनेसनल इन्स्टिच्युट अफ एजुकेसन' ले अस्ट्रेलिया तास्मानियाको होबार्टमा पनि नयाँ कलेज सञ्चालनको अनुमति पाएको छ।
नयाँ कलेजको नाम 'आइआइई तास्मानिया क्याम्पस' रहने कलेजका संस्थापक सिइओ सागर लोहनीले जानकारी दिए।
तास्मानियाको नियम अनुसार प्राविधिक विषय एक वर्ष पढेपछि विद्यार्थीलाई भिसाको लागि अझ सहज हुने भएकाले पनि नयाँ प्राविधिक कलेजमा विद्यार्थीको आकर्षण रहने लोहनीले बताए।
उक्त नयाँ कलेजमा हस्पिटालिटी म्यानेजमेन्ट, आइटी, लिडरसीप एण्ड म्यानेजमेन्टमा एड्भान्स डिप्लोमा साथै सामाजिक सेवा, आइटी, लिडरसीप एण्ड म्यानेजमेन्टमा डिप्लोमा र म्यानेजमेन्टमा ग्र्याजुएट डिप्लोमा पढाइ हुने आइआइई तास्मानिया क्याम्पस प्रमुख वसन्त घिमिरेले जानकारी दिए।
साविकको कलेजमा ४ सय बीस र नयाँमा ३ सय ५० गरी अब आइआइई ७ सय ७० विद्यार्थी क्षमतामा सञ्चालनमा आउनेछ।
कलेजमा प्राविधिक र व्यवसायिक सीपसम्बन्धी कोर्स भएकोले कलेजको पढाइ जुनसुकै देशमा रोजगारमूलक हुने लोहनीको दाबी छ।
अधिकांश विद्यार्थीको काम र पढाइबीच सामान्जस्य नभएको सन्दर्भमा यस खाले प्राविधिक विषय पढेर स्नातक तथा स्नातकोत्तर अध्यन गर्ने विद्यार्थीले काम पाउन सजिलो हुने र आफ्नो पढाइ अनुसारको काम समेत पाउने भएकाले यसखाले कोर्स सुरू गरिएको लोहनीले बताए।
हाल सालैका वर्षमा अस्ट्रेलिया सरकारले आवासीय मापदण्डमा धेरै परिवर्तन गरेको छ।
प्राविधिक र व्यावसायिक सीप भएका व्यक्तिलाई सहज हुने हुँदा कलेजप्रति विद्यार्थीको आकर्षण रहने लोहनीको भनाइ छ।
गत वर्ष न्यू साउथ वेल्समा सुरू भएको आइआइईका विद्यार्थीले साउदर्न क्रस युनिभर्सिटीमा क्रेडिट ट्रान्सफर पाउने सुविधा समेत रहेको बताइएको छ।
