बेलायतमा विगत तीस वर्षदेखि अन्तर्राष्ट्रिय कानून र मानव अधिकार प्राध्यापन गर्दै आएका प्रा.डा. सूर्यप्रसाद सुवेदीले आफ्नो निजी पुस्तकालय त्रिभुवन विश्वविद्यालय अन्तर्गतको नेपाल ल क्याम्पसलाई चन्दा दिने भएका छन्।
आफ्ना प्रकाशन र आफूले विद्यार्थी जीवनदेखि संग्रह गरेका राष्ट्रिय तथा अन्तर्राष्ट्रिय कानून र मानव अधिकार सम्बन्धि बहुमूल्य पुस्तकसँगै दश लाख रूपैंया नगद उनले दिने भएका हुन्।
वेलायतको हल विश्वविद्यालयवाट विशिष्ट श्रेणीमा प्रथम भै स्नातकोत्तर र अकस्फोर्ड विश्वविद्यालयवाट विद्यावारिधि र महाविद्यावारिधि जस्ता प्राज्ञिक क्षेत्रका सर्वोच्च उपाधि हाँसिल गर्दा आफूले अध्ययन गरेका र प्राध्यापनका लागि किनेका ग्रन्थहरू आफूले कानूनमा स्नातक गरेको संस्था नेपाल ल क्याम्पसलाई दिने निधो गरेका हुन्।
उनले यी सबै पुस्तकहरू आफ्नै खर्चमा नेपाल पठाउन लागेका हुन्। लीड्स, लण्डन र अक्सफोर्ड विश्वविद्यालयलगायत संसारका सात वटा विश्वविद्यालयमा प्राध्यापन गरेका प्रा सुवेदीका अन्तर्राष्ट्रियस्तरका यस्ता ग्रन्थले नेपालका वर्तमान र भावी पुस्ताका छात्र/छात्रा लाभान्वित हुने उनले आशा गरेका छन्।
उनले दिएको दश लाख रूपैंया नगदलाई नेपाल ल क्याम्पसको मुद्दती खातामा जम्मा गरि त्यसको वार्षिक आयबाट प्रत्येक वर्ष नयाँ-नयाँ ग्रन्थहरू नेपाल ल क्याम्पसको पुस्तकालयमा थप्दै जाने भएको छ।
