प्राथमिक सेयर (आइपिओ) भर्नेहरुको संख्या बढ्दै गएको छ। चन्द्रागिरि हिल्समा खुलेको आइपिओमा १२ लाख ५१ हजार ९३८ जनाले आवेदन दिएका छन्।
आइपिओमा परेको आवेदन संख्या यो हालसम्मकै उच्च हो। बिक्री प्रवन्धक ग्लोबल आइएमई क्यापिटलका अनुसार २ अर्ब ४४ करोड २९ लाख ८४ हजार रुपैयाँको आवेदन परेको हो।
सेयर बाँडफाँड नभएसम्म यो रकम आवेदकको बैंक खातामा ब्लक हुनेछ। कम्पनीले सर्वसाधारणका लागि कुल १३ लाख ९६ हजार कित्ता सेयर निश्कासन गरेको हो।
धितोपत्र बाँडफाँड निर्देशिकाअनुसार पुगेसम्म सबैलाई १० कित्ता सेयर दिनुपर्नेछ। तर यो कम्पनीमा भने आवेदन दिएकामध्ये करिब ८९ प्रतिशतको हात खाली हुने भएको छ।
१ लाख ३९ हजार ६ सय जनालाई मात्रै कम्पनीको १० कित्ताका दरले सेयर बाँडफाँड गर्न पुग्नेछ।
यसअघि प्रभु लाइफ इन्स्योरेन्समा १० लाख ६२ हजारले आवेदन दिएका थिए।
चन्द्रागिरि हिल्सपछि माघ २ देखि पूर्वाधार बैंकको आइपिओ खुल्दैछ। ८ करोड कित्ता सर्वसाधारण समूहको सेयर खुल्ने भएकाले सो कम्पनीको सेयर भने सबैलाई बाँडफाँड गर्न पुग्नेछ।
हालसम्म डिम्याट खाता खोल्नेको संख्या २४ लाख ८७ हजार १०७ पुगेको छ।