भोलिदेखि काठमाडौं उपत्यकामा एक सातासम्म निषेधाज्ञा घोषणा गरिएको छ।
निषेधाज्ञाको बेला बैंक तथा वित्तीय संस्थाहरु विहान १० बजेदेखि दिउँसो २ बजेसम्म मात्रै खुल्ने भएका छन्।
नेपाल राष्ट्र बैंक र बैंकहरुबीच २ बजेसम्म मात्रै संस्थाहरु खोलेर सेवा दिने सहमति भएको हो। स्वास्थ्य सम्वन्धी मापदण्डको पुर्ण पालना गर्दै वित्तीय संस्थाहरुले ४ घण्टा सेवा दिने छन्।
सेवाग्राही र कर्मचारीबीच दूरी कायम राख्ने, मास्क प्रयोग गर्ने, सकेसम्म कर्मचारी घटाउने, विद्युतीय सेवालाई जोड दिएर बैंकिङ सेवा सुचारु हुनेछ।
सार्वजनिक र अत्यावश्यक बाहेकका निजी सवारी साधन नचल्ने भएकाले बैंकहरुमा भिडभाड नहुने अनुमान छ। बैंकका कर्मचारीहरुले बैंकले प्रदान गरेको परिचय पत्रका आधारमा आवतजावत गर्न सक्ने छन्।
बैंकका कतिपय कर्मचारीहरुले कोरोना खोप समेत लगाएका छन्। बैंकका कर्मचारी कोरोना संक्रमणको जाेखिममा छन्।
राष्ट्रिय वाणिज्य बैंकका सिइओ किरणकुमार श्रेष्ठसहित सो बैंकका ५२ कर्मचारी संक्रमित भएका छन्।
बैंक तथा वित्तीय संस्थाको सेवा पनि अत्यावश्यक सेवाअन्तर्गत पर्ने भएकाले सेवा सुचारू हुने भएको हो।
