एसियन लाइफ इन्स्योरेन्स कम्पनीका भुक्तानी अब पूर्ण स्वचालित हुने भएका छन्।
आफ्ना सम्पूर्ण भुक्तानी एनआइसी एसिया बैंकको खाताबाट स्वचालित रूपमा सोझै लाभग्राहीको खातामा जम्मा हुने गरी एनसिएचएलको नेशनल पेमेन्ट्स इन्टरफेस (एनपिआई)मा एसियन लाइफ आबद्ध भएको छ।
सोही अनुसार एसियन लाइफले आजैबाट कारोबार सुचारु गरेको छ।
कनेक्ट आइपिएस तथा एनसिएचएल आइपिएस प्रणालीहरु मार्फत स्वचालित रुपमा एसियन लाइफले बीमा लेखको भुक्तानी, बीमा दाबी भुक्तानी, एजेन्ट कमिसन, तलब, भेण्डर भुक्तानी, लगायतका कारोबार गर्नेछ।
एसियन लाइफले बीमा प्रिमियम संकलनका लागि पहिलेदेखि नै विभिन्न डिजिटल माध्यमको प्रयोग गर्दै आएको थियो। यो व्यवस्था पछि आफ्नो सेवा सञ्चालन थप छरितो र सहज हुनुका साथै विभिन्न खाताको पुँजी व्यवस्थापन गर्ने प्रकृया पनि थप व्यवस्थित हुने कम्पनीको दावी छ।
लाभग्राहीले कम्पनीबाट भुक्तानी प्राप्त गर्न कम्पनी नै पुग्नु पर्ने वा चेक लिनु पर्ने व्यवस्थाको पनि अन्त्य भई भुक्तानी सोझै आफ्नो बैंक तथा वित्तीय संस्थाको खातामा प्राप्त गर्न सक्ने छन्।
एसियन लाईफ सँगै २८ जीवन तथा निर्जीव बीमा प्रदायक कम्पनीहरुको बीमा शूल्क (प्रिमियम) को संकलन हाल अनलाइन मार्फत कनेक्ट आइपिएस इपेमेन्टबाट भइरहेको छ।
६ वटा बीमा कम्पनी एनपिआई प्रणालीमा आबद्ध भैसकेका छन्। यसमा हालसम्म बैंक तथा वित्तीय संस्थासहित ६१ सदस्य आबद्ध छन् भने अन्य पिएसपी÷ पिएसओ, इन्स्योरेन्स कम्पनीहरु, रेमिटेन्स, मर्चेन्ट बैंक, सरकारी तथा अर्ध–सरकारी संस्थाहरु लगायतका ५६ गैर—बैंकिङ्ग संस्थाहरु अप्रत्येक्ष प्राविधिक सदस्यका रुपमा आबद्ध छन्।
एसियन लाईफ इन्स्योरेन्स प्रख्यात व्यावसायिक तथा व्यक्तिगत प्रवद्र्धकहरुद्वारा प्रवद्र्धित कम्पनी हो। १४ वर्ष भन्दा बढीको सञ्चालन अवधिमा एसियन लाइफले आफ्ना १४६ शाखाहरु तथा ९३ हजार भन्दा बढी एजेन्टहरु मार्फत ५ लाख ६८ हजार भन्दा बढी बीमा कर्ताहरुलाई बीमा सम्बन्धी विभिन्न सेवा प्रदान गर्दै आएको छ।