बिहीबार झण्डै साढे २० अर्ब रुपैयाँको सेयर किनबेच भएको छ। परिसूचक १८.२४ अंकले घटेका दिन २० अर्ब ४९ करोड रुपैयाँको सेयर किनबेच भएको हो।
यस दिन बैंकिङ समूह १९ अंकले घट्यो। होटल तथा पर्यटन ३०, विकास बैंक १६२, जलविद्युत १२३, फाइनान्स ७३, उत्पादन १९ र लगानी समूह ५ अंकले घटे।
यस दिन बीमाका लगानीकर्ताले भने राम्रो मूल्य कमाएका छन्। जीवन बीमा समूह सबैभन्दा धेरै ४६८ अंकले बढ्यो भने निर्जीवन बीमा समूह ४५७ अंकले बढ्यो। त्यस्तै अन्य ३४ र माइक्रोफाइनान्स ५० अंकले बढे।
जीवन विकास लघुवित्तको मूल्य सबैभन्दा धेरै १० प्रतिशतले बढेको छ। सो कम्पनीको मूल्य प्रतिकित्ता ३ हजार ९०६ रुपैयाँ पुगेको छ। त्यस्तै रिडी हाइड्रोपावरको मूल्य ८.५ प्रतिशतले बढेर प्रतिकित्ता १ हजार ३७ रुपैयाँ कायम भएको छ।
साना किसान विकास बैंकको मूल्य साढे ७ प्रतिशतले बढ्यो। सिइडिबी हाइड्रो र युनाइटेड इन्स्योरेन्सको मूल्य ६ प्रतिशतभन्दा धेरैले बढ्यो।
यस दिन तीन कम्पनीको मूल्य १० प्रतिशतले घटेको छ। जलविद्युत लगानी तथा विकास कम्पनी, खानीखोला हाइड्रो र पन्चकन्या माइ हाइड्रोको मूल्य सबैभन्दा धेरै १० प्रतिशतले घटेको हो। ङादी ग्रुप र माउन्टेन हाइड्रोको मूल्य ८ प्रतिशतले घटेको छ।
कारोबारका आधारमा अरुण काबेली र अरुण भ्याली अग्रस्थानमा रहे। दुवै कम्पनीको १ अर्ब १६ करोड बढीको कारोबार भयो। नेसनल हाइड्रोपावर, रिडी हाइड्रोपावर, जलविद्युत लगानी तथा विकास कम्पनी पनि कारोबारका आधारमा उत्कृष्ट पाँचभित्र पर्न सफल भए।