सोमबार सेयर बजार ३४.९५ अंकले घटेर २,३८६.०१ को विन्दुमा पुगेको छ। अघिल्लो दिनको तुलनामा आज कारोबार रकम पनि घटेको छ।
आइतबार कुल २३८ किसिमका धितोपत्र तथा ऋण कारोबार हुँदा कुल ६६ लाख ३९ हजार ५०४ सेयर किनबेच भएको थियो। सो दिन २ अर्ब ५३ करोड १२ लाख रुपैयाँ बढीको कारोबार भएको थियो। तर आज २३९ किसिमका धितोपत्र तथा ऋण कारोबार हुँदा ५० लाख ४७ हजार ७६९ सेयर किनबेच हुँदा २ अर्ब ४ करोड २२ लाख रुपैयाँको कारोबार भएको छ।
साताको पहिलो दिन हिजो आइतबार नेप्से बढेको थियो। नियमित घटिरहेको बजारमा स्थानीय तहको चुनाव हुने लगभग पक्का भएपछि र विश्व बैंकले नेपालको अवस्था श्रीलंकाको जस्तो नरहेको प्रतिवेदन सार्वजनिक गरेपछि पनि लगानीकर्तामा सकारात्मक सन्देश सञ्चार भएको थियो।
साथै, नेपाल धितोपत्र बोर्डले ब्रोकरहरूले समेत कर्जा दिन सक्ने मार्जिन कर्जा सम्बन्धी कार्यविधि संसोधन गरेपछि पनि लगानीकर्तामा आशाको सञ्चार भएको थियो। यद्यपि बजारमा तरतला अभावको समस्या कायमै रहेको र बजार केही समयदेखि बियरिस ट्रेन्डमा रहेकोले पनि सोमबार समेत बजार घट्न पुगेको हो।
सोमबार कुल २३९ किसिमका धितोपत्र तथा ऋण कारोबार हुँदा जम्मा ४५ वटाको मूल्य बढेको छ भने १७६ वटाको मूल्य घटेको छ। आज जाल्पा सामुदायिक लघुवित्त वित्तीय संस्थाको ९.९९ प्रतिशतले बढेको छ। यसबाहेक अन्यको ४ प्रतिशतभन्दा कमले मात्रै सेयर मूल्य बढेको छ।
कारोबार रकमको आधारमा आज सबैभन्दा धेरै रकमको कारोबार भएको कम्पनीमध्ये अरुण भ्याली हाइड्रोपावर, शिवम् सिमेन्ट, हिमालयन डिस्टिलरी, अपि पावर, एनआइसी एशिया बैंक, नबिल बैंक लगायत छन्।
अरुण भ्याली हाइड्रोपावरको मात्रै आज ८ करोड ११ लाख, शिवम् सिमेन्टको ६ करोड ६२ लाख, हिमालयन डिस्टिलरीको ६ करोड ४३ लाख, अपि पावरको ५ करोड ६८ हजार र एनआइसी एशिया बैंकको ५ करोड ३८ लाख रुपैयाँको कारोबार भएको छ।
