नेप्से कारोबारको लागि अन्तिम दिन आज बजार १.६३ प्रतिशतले घटेको छ। बिहीबार सेयर बजार ३७.०६ अंकले घटेर २,२३८.६२ विन्दुमा पुगेको हो। अघिल्लो दिन नेप्से ३१.७६ अंकले घटेर २,२७५.६८ विन्दुमा पुगेको थियो।
बिहीबार जम्मा २३२ किसिमका धितोपत्र तथा ऋणपत्र कारोबार भएको छ। नेप्से घटेपनि लगानीकर्ताहरू सेयर किनबेचमा सक्रिय देखिन्छन्। आज ४६ लाख ७४ हजार ९४० सेयर किनबेच हुँदा एक अर्ब ६५ करोड ४५ लाख ६१ हजार रुपैयाँको कारोबार भएको छ। यो अघिल्लो दिनको तुलनामा बढी हो।
अघिल्लो दिन जम्मा ३६ लाख २ हजार ८४८ सेयर किनबेच हुँदा एक अर्ब २६ करोड ९२ लाख १९ हजार रुपैयाँको कारोबार भएको थियो।
कुल २३२ किसिमका धितोपत्र तथा ऋणपत्र कारोबार हुँदा ८ वटाको मूल्य बढेको छ भने २२२ वटाको मूल्य घटेको छ। आज कारोबारमा आएका १३ उपसमूहमध्ये सबैको सूचक नकारात्मक देखिएको छ। सबैभन्दा धेरै फाइनान्सको २.९३ प्रतिशतले घटेको हो। यसपछि हाइड्रोपावरको २.६५ र नन लाइफ फाइनान्सको २.५८ प्रतिशतले घटेको हो।
बजारमा तरलता अभाव कायम नै रहेकोले सेयर बजार लगातार घटिरहेको छ। केही लगानीकर्ताहरू भने बजार घटिरहेको समय दीर्घकालिन लगानीको लागि अवसर बन्न सक्ने बताउँछन्।
आज जाल्पा सामुदायिक लघुवित्त वित्तीय संस्थाको सकारात्मक सर्किट ब्रेक लागेको छ। अघिल्लो दिन यसको ९.९९ प्रतिशतले बढेको थियो। कम्पनीको मूल्यमा लगातार वृद्धि भइरहेको छ। लघुवित्तको सेयर मूल्य बढेर एक हजार पाँच सय २० रुपैयाँ ६० पैसामा अन्तिम कारोबार भएको छ।
आज घलेम्दी हाइड्रो, मैलुङ खोला जलविद्युत, शिवश्री हाइड्रोपावर, युनियन हाइड्रोपावर, ग्रीन भेन्चर्स, पञ्चकन्या माई हाइड्रोपावर र बुद्धभूमि नेपाल हाइड्रोपावरको सेयर मूल्य भने ६ प्रतिशत भन्दा बढीले घटेको छ। घलेम्दी हाइड्रो ६.८६ प्रतिशतले घटेको हो।
कारोबार रकमको आधारमा आज सबैभन्दा धेरै रकमको कारोबार भएको कम्पनीमध्ये सूर्या लाइफ इन्स्योरेन्स कम्पनी, एनआइसी एशिया बैंक, नबिल बैंक, हिमालयन डिस्टिलरी लिमिटेड, अरुण भ्याली हाइड्रोपावर लगायत हुन्।
बिहीबार सूर्या लाइफको मात्रै ८ करोड ४५ लाख ८७ हजार रूपैयाँ, एनआइसी एशिया बैंकको ६ करोड ७३ लाख ६१ हजार रूपैयाँ, नबिल बैंकको ४ करोड ५२ लाख ९ हजार रूपैयाँ, हिमालयन डिस्टिलरीको ४ करोड ४४ लाख ६५ हजार रूपैयाँ र अरुण भ्याली हाइड्रोपावरको ४ करोड १२ लाख ५६ हजार रूपैयाँ कारोबार भएको हो।