सोमबार नेप्से परिसूचक ९.७५ अंकले घटेर २,०७६.६७ बिन्दुमा पुगेको छ। नेप्से घटेपनि कारोबार रकम भने आज करिब दुई गुणाले बढेको छ।
अघिल्लो दिन नेप्से परिसूचक करिब ५८ अंकले बढ्दा कारोबार रकम २ अर्ब ४८ करोड ४ लाख ७३ हजार रुपैयाँको सेयर कारोबार भएको थियो। आज भने कारोबार रकम ४ अर्ब ३४ करोड ९२ लाख ७३ हजार रुपैयाँको सेयर कारोबार भएको हो।
सोमबार कुल २३४ किसिमका धितोपत्र तथा ऋणपत्रको १ करोड ९ लाख ८१ हजार ५९१ कित्ता सेयर किनबेच भएको छ। कारोबार भएका धितोपत्र तथा ऋणपत्रमध्ये जम्मा ८४ वटाको मूल्य बढेको छ भने १३९ वटाको मूल्य घटेको छ। आज सिवाइसी नेपाल लघुवित्त वित्तीय संस्थाको ९.९९ प्रतिशतले सेयर मूल्य बढेको छ। यसपछि न्यादी ग्रुप पावरको ९.९८ प्रतिशतले सेयर मूल्य बढेको छ।
कारोबार रकमको आधारमा आज सबैभन्दा धेरै शिवम् सिमेन्टको १७ करोड ५८ लाख ८३ हजार रुपैयाँको सेयर कारोबार भएको छ।
यसपछि हिमालयन डिस्टिलरीको १६ करोड ९० लाख ५१ हजार रुपैयाँ, एसियन लाइफ इन्स्योरेन्सको १२ करोड ९६ लाख ६७ हजार रुपैयाँ, अरुण काबेलीको ११ करोड ७८ लाख ८६ हजार रुपैयाँ र अपर तामाकोशी हाइड्रोपावरको ११ करोड ६७ लाख ३ हजार रुपैयाँको कारोबार भएको छ।
