साताको दोस्रो कारोबार दिन सोमबार नेप्से परिसूचक १७.६८ अंकले घटेको छ।
यस दिन नेप्से परिसूचक ०.८३ प्रतिशतले घटेर २१०६.१५ बिन्दुमा पुगेर बन्द भएको छ।
सोमबार कारोबारमा आएका २१४ वटा धितोपत्र तथा ऋणपत्रको २ अर्ब ८५ करोड ७० लाख ७२ हजार ९६१ रुपैयाँ बराबरको सेयर खरिद–बिक्री भएको छ।
नेप्से परिसूचक घटेपनि कारोबार रकम भने आइतबारको तुलनामा सोमबार बढेको छ। आइतबार २ अर्ब ६७ करोड ३३ लाख ३८ हजार २३२ रुपैयाँ बराबरको सेयर कारोबार भएको थियो।
सोमबार गुराँस लघुवित्त र हिमालयन हाइड्रोपावरको सेयर मूल्यमा सकारात्मक सर्किट लागेको छ। दुवै कम्पनीको सेयर मूल्य १० प्रतिशतले बढेर अन्तिम मूल्य प्रतिकित्ता ११ सय र २५० रुपैयाँ कायम भएको छ।
यस दिन सेयर मूल्य सर्वाधिक घट्नेमा जानकी फाइनान्स रहेको छ। कम्पनीको सेयर मूल्य ४.३१ प्रतिशतले घटेर अन्तिम मूल्य ४४४ रुपैयाँ कायम भएको छ।
सोमबार सर्वाधिक सेयर खरिद–बिक्री शिवम् सिमेन्टको भएको छ। कम्पनीको २० करोड ७१ लाख रुपैयाँ बराबरको सेयर खरिद–बिक्री भएको हो। सो कम्पनीको सेयर मूल्य प्रतिकित्ता ७६४ रुपैयाँ कायम भएको छ। यो मूल्य अघिल्लो दिनको तुलनामा २.६८ प्रतिशतले घटेको हो।
सर्वाधिक सेयर खरिद–बिक्री हुने दोस्रो कम्पनीमा नबिल बैंक रहेको छ। यस दिन उक्त कम्पनीको प्रतिकित्ता मूल्य ८०३ रुपैयाँमा १० करोड ८५ लाख रुपैयाँ बराबरको सेयर खरिद–बिक्री भएको छ।
त्यस्तै, आज कारोबारमा आएका १३ वटा समूहगत परिसूचकमध्ये उत्पादन तथा प्रशोधन र म्युचुअल फण्ड समूहको परिसूचक ०.१ र ०.२७ प्रतिशतले बढेको छ भने बाँकी ११ समूहको परिसूचक घट्दा समग्र नेप्से घटेको हो।
यस दिन अन्य समूहको परिसूचक सर्वाधिक २.४२ प्रतिशतले घटेको छ। त्यस्तै, होटल्स तथा पर्यटन, विकास बैंक, जलविद्युत, वित्त, जीवन बीमा र लगानी समूहको परिसूचक १ प्रतिशतभन्दा धेरैले घटेको छ।