नेपाल स्टक एक्सचेञ्ज (नेप्से) मा सूचीकृत १६ वटा विकास बैंक मध्ये हालसम्म तीन विकास बैंकले मात्र आर्थिक वर्ष २०७८/७९ को लाभांश घोषणा गरेका छन्।
गरिमा विकास बैंक, शाइन रेसुङ्गा डेभलपमेन्ट बैंक र लुम्बिनी विकास बैंकले गत वर्षको मुनाफाबाट लाभांश दिने घोषणा गरेका हुन्।
यी तीन विकास बैंक मध्ये सबैभन्दा धेरै लाभांश गरिमा विकास बैंकले दिने भएको हो।
उक्त बैंकले यो वर्ष १४.५ प्रतिशत लाभांश वितरण गर्ने घोषणा गरेको छ। बैंकले हाल कायम चुक्ता पुँजीको १३ प्रतिशत बोनस सेयर र कर प्रयोजनका लागि १.५ प्रतिशत नगद लाभांश दिने घोषणा गरेको हो।
गत वर्ष कम्पनीले १६ प्रतिशत बोनस वितरण गरेको थियो। गत वर्षको तुलनामा यस बैंकको लाभांश दरमा कमी आएको छ।
त्यस्तै, शाइन रेसुङ्गा डेभलपमेन्ट बैंकले सेयरधनीहरूका लागि १३.३ प्रतिशत बोनस सेयर र कर प्रयोजनका लागि ०.७ प्रतिशत नगद लाभांश गरी कुल १४ प्रतिशत लाभांश दिन लागेको हो।
गत वर्ष यस बैंकले १०.९३ प्रतिशत बोनस सेयर र कर प्रयोजनका लागि ०.५७ प्रतिशत नगद लाभांश गरी कुल ११.५ प्रतिशत लाभांश वितरण गरेको थियो।
यस बैंकले पनि गत वर्षको तुलनामा बोनस दर घटाएको हो।
यसैगरी, लुम्बिनी विकास बैंकले भने यो वर्ष १२ प्रतिशत लाभांश वितरण गर्न लागेको हो। बैंकले गत वर्षको मुनाफाबाट हाल कायम चुक्ता पुँजीको ३ प्रतिशत बोनस सेयर र ९ प्रतिशत नगद लाभांश दिने घोषणा गरेको हो।
गत वर्ष यस बैंकले १३ प्रतिशत बोनस सेयर र कर प्रयोजनका लागि ०.६९ प्रतिशत नगद लभांश दिएको थियो।
यस बैंकले पनि गत वर्षको तुलनामा लाभांश दर घटाएको छ भने बोनसभन्दा नगद लाभांशमा जोड दिएको छ।
यी तीन वटै बैंकको लाभांश नियामक निकाय नेपाल राष्ट्र बैंककाे स्वीकृति पछि बैंकको आगामी वार्षिक साधारण सभाबाट पारित भएपछि सेयरधनीहरूमा वितरण हुनेछ।
