लकडाउनले बन्द भएको व्यावसायिक नियमित हवाइ उडान भदौदेखि फेरि सुरु गर्ने सरकारले निर्णय गरेको छ। सरकारको उक्त निर्णयसँगै संस्कृति पर्यटन तथा नागरिक उड्डयन मन्त्रालयले कोरोना संक्रमण फैलिन नदिनका लागि प्रोटोकल बनाइरहेको छ।
मन्त्रालय मातहतका नागरिक उड्डयन प्राधिकरण, त्रिभुवन अन्तर्राष्ट्रिय विमानस्थ कार्यालयले उडानका लागि तयारी गरिरहेका छन्। भदौ १ देखि उडान सुरु हुनेवित्तिकै स्वभाविक रुपमा पूर्ण क्षमतामा उडान हुने छैनन्।
त्रिभुवन अन्तर्राष्ट्रिय विमानस्थल कार्यालयले भने सुरुमा सीमित क्षमतामा मात्र उडान खोल्ने तयारी गरेको छ।
विमानस्थलका प्रमुख देवेन्द्र केसीले कोरोना जोखिमलाई हेरेर दैनिक १५ वटासम्म उडान गर्न सक्ने अवस्थामा विमानस्थल रहेको बताए। सामान्य अवस्थामा दैनिक ८० बढी अन्तर्राष्ट्रिय उडान हुने विमानस्थलमा कोरोना जोखिम भएकाले प्रक्रिया केही लामो लाग्ने छ।
सोहीकारण विमानस्थलकै क्षमता पनि पहिलेजत्तिकै हुने छैन। त्यस्तै यात्रुको माग नै न्यून हुने भएकाले एयरलाइन्सले पनि सुरुमा थोरै मात्र उडान तालिका बनाउने छन्।
त्यस्तै आन्तरिक उडान तर्फ दैनिक ३० देखि ४० वटा सम्म उडान गर्न सम्भव हुने उनले जानकारी दिए।
अन्तर्राष्ट्रिय यात्रुका लागि विमान उडान हुने समयभन्दा कम्तिमा चार घण्टाअघि विमानस्थल प्रस्थान हुनुपर्ने व्यवस्था गरिने उनले बताए। सामान्य अवस्थामा आफ्नो उडान समयभन्दा तीन घण्टाअघि विमानस्थल पुग्नुपर्ने व्यवस्था थियो। विमानस्थल प्रमुख केसीले स्वास्थ्य सुरक्षा अपनाउनका लागि साधन स्रोत बढाउनुपर्ने बताए।
विमानस्थलसँग भएको जनशक्ति सामान्य अवस्थाका लागि पर्याप्त भए पनि संक्रमणको जोखिम कम गर्न साधन स्रोत थप्नुपर्ने उनको भनाइ छ।
कोरोना संक्रमणका हिसाबले विमानस्थल अत्यन्त संवेदनशील ठाउँ भएकाले स्वास्थ्य सुरक्षाका प्रोटोकललाई पूर्णरुपमा पालना गर्न र गराउन विमानस्थल सक्षम रहेको उनले बताए।