रौतहट जिल्लामा रहेको श्रीराम सुगर मिल बन्द भएको छ।
वर्षेनी घाटा बढ्दै गएको र कोभिड १९ कारण झनै घाटा बढेकाले कम्पनी बन्द गरिएको कम्पनीले एक सूचना जारी गर्दै जानकारी गराएको छ।
नेपाल स्टक एक्सचेन्जमा सुचीकृत उक्त कम्पनीले नेप्सेमार्फत् बन्द भएको सूचना प्रकाशित गरेको हो।
वर्षेनी करोडौं घाटा हुँदै आएको यो वर्षसम्म कूल २ अर्ब १७ करोड नोक्सानी पुगेको कम्पनीले जानकारी दिएको छ। गोल्छा अर्गनाइजेशनको लगानी रेहको मिल साउन ११ गतेदेखि स्थायी रुपमा बन्द गर्ने निर्णय भएको हो।
गएको चार महिनादेखि कर्मचारीको तलब भत्तासमेत दिन नसकिएको र चल अचल सम्पत्ति बिक्री गरेर भएपनि भुक्तानी गर्ने सञ्चालकहरुले प्रतिबद्धतता गरेका छन्।
कम्पनी बन्द गरी बाँकी रहेको जिम्मेवारी पुरा गर्नका लागि चल अचल सम्पत्ति बिक्री गर्नका लागि सरकारसँग अनुमति माग गरिएको र अनुमति पाउनेवित्तिकै कर्मचारीको तलब तथा सुविधा र किसानको बक्यौता भुक्तानी गरिने बताइएको छ।
कोभिड सुरु भएपछि नेपालमा पहिलोपटक कंगाल भएको घोषणा गर्दै कम्पनी बन्द गर्ने निर्णय भएको हो।
