बुद्ध एयरले सिमरा विमानस्थलमा ७२ सिट क्षमताको जहाजबाट परीक्षण उडान गरेको छ।
यसअघि अधिकतम ४२ सिट क्षमताको जहाजबाटमात्र उडान गर्दै आएको बुद्धले सिमरामा एटिआर ७२ बाट उडान गर्ने तयारी गरेको छ। सोहीअनुसार नेपाल नागरिक उड्डय प्राधिकरणको अनुमतिमा परीक्षण उडान गरिएको एयरलाइनले जानकारी दिएको छ।
काठमाडौंबाट १७ जना हवाई प्राविधिकसहितको टोली लिएर बुधबार बुध्द एयरको एटिआर५००-७२ सिरिजको जहाजले दक्षिण र उत्तर दुवैतर्फबाट उडान तथा अवतरण गरेको थियो।
नागरिक उड्डयन प्राधिकरणले निर्धारण गरेको सबै सुरक्षा मापदण्ड पालना गरिएको बुद्धले जानकारी दिएको छ।
सिमरामा ७२ सिट क्षमताको जहाजबाट नियमित उडान भएमा यात्रुले सस्तो यात्राको अवसर पाउने छन्।
लकडाउनअघि बुद्धले काठमाडौं-सिमरामा दैनिक ९ ओटासम्म नियमित उडान गर्दै आएको थियो।
११९० मिटर लामो धावनमार्ग रहेको विमानस्थलमा यो जहाजको व्यावसायिक उडानको अनुमति भने पाएको छैन।
बुध्द एयरसँग ८ वटा एटीआर–७२, तीनवटा एटीआर–४२ र २ वटा बीच १९०० 'डी' जहाज रहेका छन्।