काठमाडौँको गोङ्गबुस्थित नयाँ बसपार्कमा लोत्से मल सञ्चालनमा आएको छ।
लोत्से बहुउद्देश्यीय प्रालिको एक अर्ब २५ करोड रुपैयाँमा निर्माण गरिएको लोत्से मलको शुक्रबार कम्पनीका अध्यक्ष इञ्जिनीयर दिपक कुँवर, सञ्चालक हर्कबहादुर तामाङ र लक्ष्मी बैंकका सहायक प्रमुख कार्यकारी अधिकृत सुविद भट्टराईले संयुक्त रुपमा शुभारम्भ गरे।
गोङ्गबुस्थित विष्णुमती किनारमा १६१ रोपनी क्षेत्रफलमा फैलिएको नयाँ बसपार्कभित्र १३ रोपनी क्षेत्रफलमा लोत्से मल निर्माण गरिएको हो। ८ तलाको ल्होत्से हलमा १०० साना गाडी र २०० मोटरसाइकल अट्ने अण्डरग्राउण्ड पार्किङ रहेको शुक्रबार आयोजित पत्रकार सम्मेलनमा जानकारी दिइएको छ।
लोत्से बहुउद्देश्यीय प्रालिका अध्यक्ष दिपक कुँवरले आफूहरुले चुनौतीका वावजुत मल निर्माण गरिएको भन्दै राज्यले पनि व्यवसायीहरुलाई सहज वातावरण बनाइदिनुपर्ने बताए। उनले राज्यले व्यवसायीको व्याजको सहजीकरण गरिदिनुपर्नेमा जोड दिए।
मलभित्र २०२ पसल कवल, सुविधासम्पन्न दुई वटा रेष्टुरेन्ट, दुई वटा पार्टी प्यालेस, दुई वटा सिनेमा हल, न्यू वाल अन्तर्राष्ट्रिय होलसेल बजार रहेका छन्। त्यस्तै बैंक, वित्तीय संस्था, सहकारी, सैलुन लगायतका पसलहरु पनि सञ्चालनमा छन्। उक्त मलभित्र ६ वटा लिफ्ट र १४ वटा एलिभेटर लिफ्ट समेत छन्।
नयाँ बसपार्कलाई अन्तर्राष्ट्रिय स्तरको बनाउन लोत्सेले प्रविधिलाई जोड दिएको छ। हाल ३२ टिकट काउण्टरलाई प्रविधिसँग जोडिएको अध्यक्ष कुँवरले बताए।
बसका चालक, सहचालक र यात्रुहरुलाई लक्षित गरेर सहुलियतदरमा सफा र स्वस्थ खाना, खाजा र बस्नको व्यवस्थाका लागि होटल तथा लजको समेत व्यवस्था गरिएको छ। बसपार्कभित्र अपांगमैत्री शौचालय, पेट्रोल पम्प, ग्यारेज र प्रहरी कार्यालय समेत सञ्चालनमा ल्याइएको छ।
