नेकपा (एमाले) का उपाध्यक्ष सुरेन्द्र पाण्डेले नेपालको पुँजीगत खर्चको अवस्था राम्रो हुन नसकेको बताएका छन्।
प्रोग्रेसिभ इन्जिनियर्स एसोसिएसन नेपालले शुक्रबार आयोजना गरेको 'पुँजीगत खर्च: राष्ट्रिय अर्थतन्त्रमा प्रभाव' विषयक कार्यक्रममा उनले विगतदेखि नै देशमा पुँजीगत खर्चको अवस्था राम्रो हुन नसकेको बताएका हुन्।
'पुँजीगत खर्चको अवस्था कमजोर बन्दै गएको छ। आर्थिक वृद्धिका कारणले पनि अहिले असर गरिरहेको छ,' पूर्व अर्थमन्त्रीसमेत रहेका पाण्डेले भने, 'वर्तमान सरकार चालु खर्च बढाउनेतर्फ लाग्नु हुँदैन।'
कार्यक्रममा पूर्व अर्थमन्त्री डा युवराज खतिवडाले व्यापार घाटा निरन्तर बढ्दै गएको उल्लेख गर्दै २५ प्रतिशत सरकारको र ७५ प्रतिशत लगानी निजी क्षेत्रको हुने अवस्था चित्त बुझ्दो नभएको बताए। नेपालको राजश्व र बैंकिङ प्रणाली राम्रो रहेको बताउँदै उनले सन् २०२२ मा आएर अर्थतन्त्रमा बढी प्रभाव परेको तथा विश्वमा सन् २०२४ सम्म नै आर्थिक संकट पर्ने दाबी गरे।
अर्थतन्त्रका जानकार डा सूर्यमान आचार्यले अरू राष्ट्रको नक्कल गरेर बनाएको परियोजना सफल हुन नसक्ने टिप्पणी गरे। उनले नेपालका स्रोत र क्षमतामा अन्तर हुँदा नेपाल सोचेअनुरुप आर्थिक विकास हुन नसकेको धारणा राखे।
राष्ट्रिय पुनर्निर्माण प्राधिकरणका पूर्वप्रमुख कार्यकारी अधिकृत सुशील ज्ञवालीले परियोजना निर्माण गर्दा पर्याप्त तयारी नै नहुने गरेको र सबै बजेट असारमा गएर केन्द्रित हुँदा विकासमा निर्माणमा समस्या देखिएको बताए।
एसोसिएसनका अध्यक्ष डा सुरज लामिछानेले नेपालमा पुँजीगत खर्चको स्थिति कमजोर बन्दै गएको भन्ने आम कुरा आएपछि वास्तविकता बाहिर ल्याउने उद्देश्यले कार्यक्रमको आयोजना गरेको जानकारी दिए।
