सिनामंगलस्थित काठमाडौं मेडिकल कलेजले नुवाकोटका तीन स्थानमा सञ्चालन गरेको निःशुल्क स्वास्थ्य शिविरबाट आठ हजार बिरामी लाभान्वित भएका छन्।
नुवाकोटको सूर्यगढी गाउँपालिकामा तीन दिन, तादी गाउँपालिकामा दुई दिन र दुप्चेश्वर गाउँपालिकामा तीन दिन शिविर सञ्चालन गरिएको केएमसीले जनाएको छ।
तीन पालिकामा सञ्चालित शिविरमा ७ हजार ९ सय ६६ बिरामीको निःशुल्क उपचार गरिएको केएमसीका जनरल मेनेजर नारायण दाहालले जानकारी दिए।
दाहालका अनुसार सूर्यगढीमा ३ हजार ४ सय २, तादी गाउँपालिकामा २ हजार ९ सय ४७ र दुप्चेश्वर गाउँपालिकामा १ हजार ६ सय १७ जना बिरामीले शिविरबाट स्वास्थ्य सेवा लिएका छन्।
तीन वटै शिविरमा गरी १ हजार ५३ जनाको इसिजी, १ हजार ३ सय ५६ जनाको भिडियो एक्सरे र १ हजार ६ सय ४ जनाको ल्याब टेष्ट गरिएको छ।
त्यस्तै, शिविरमै ६९ जनाको सामान्य शल्यक्रिया गरिएको छ। एक जना हाइड्रोसिल भएका विरामीको जटिल शल्यक्रिया पनि गरिएको छ। त्यस्तैगरी, १ सय ६४ जनाको दाँत फुकालिएको छ।
शिविरमा अप्रेशन सम्भव नभएका २ सय ५७ जनालाई अस्पतालमा बोलाइएको छ। उनीहरुलाई विशेष छुटमा अप्रेशन गरिने बताइएको छ। अब, चैत २० गते काभ्रेको जिरोकिलोमिटर, २३ गते काठमाडौंको मुलपानी र ३० गते काभ्रेपलान्चोकको कुशादेवीमा शिविर सञ्चालन गर्ने तयारी भइरहेको केएमसीले जनाएको छ।
यसअघि पनि केएमसीले बिभिन्न जिल्लामा निःशुल्क स्वास्थ्य शिविर सञ्चालन गरेको थियो।
1616819293.jpg)
