मध्यम र लामो दुरीको यातायात संचालन गर्न यातायात व्यवस्था विभागले पहल गर्ने भएको छ।
सोमबार विभागमा यातायात व्यवसायी, मजदुर र विभाग महानिर्देशकबीच भएको छलफलमा लकडाउनपछि सार्वजनिक सवारी साधन संचालन गर्न यातायात व्यवस्था ऐनमा व्यवस्था भएबमोजिम छोटो, मध्यम र लामो तीनै दुरीको यातायात संचालन गर्न यातायात व्यवस्था विभागले पहल गर्ने निणर्य भएको हो।
योसँगै यातायात मजदुरको समुहलाई कोरोना बीमाको लागि ५० प्रतिशत नेपाल सरकारले र ५० प्रतिशत व्यवसायीले बेहोर्ने सहमती भएको छ।
मंगलबार नेपाल यातायात व्यवसायी राष्ट्रिय महासघं, नेपाल यातायात मजदुर सघं, अखिल नेपाल यातायात मजदुर सघं र नेपाल यातायात स्वतन्त्र मजदुर युनियनले संयुक्त रुपमा पत्रकार सम्मेलन गर्दै यातायात मजदुरको कोरोनाको कारण मृत्यु भएमा आश्रित परिवारलाई क्षतिपूर्ती गराउने गरी सरकारको तर्फबाट कोषको स्थापना गर्न विभाग मार्फत मन्त्रालयमा प्रस्ताव पठाउने सहमती भएको जानकारी दिए।
तीन चरणको वार्तापछि यातायात व्यवसायी र मजदुरले ८ गतेदेखि गाडी संचालन गर्न सहमती भएको घोषणा गरे।
सरकारले असार २६ गते देखि नै जिल्लाभित्र सार्वजनिक यातायात चलाउन दिने निणर्य गरेपनि यातायात व्यवसायी र मजदुरहरुले भने विभिन्न माग राख्दै गाडी नचलाउने अडान लिदैं आइरहेका थिए।