काठमाडौं उपत्यका लगायत बढी कोरोना फैलिएको क्षेत्रमा बिहीबारबाट निषेधाज्ञा भएको छ।
सार्वजनिक सवारी साधन ठप्प छ। निजी सवारी साधन पनि काम अनुसार चल्न दिइएको छ। सर्वसाधारणलाई अत्यावश्यक काममा बाहेक बाहिर ननिस्कन आग्रह गरिएको छ।
यो अवस्थामा सबैभन्दा बढी भीड लागेको पेट्रोल पम्पमा देखिन्छ। मानिसहरू १–२ घण्टा लाइन लागेर तेल लिइरहेका छन्।
निषेधाज्ञामा पेट्रोलियम पदार्थ नपाइने हो की भन्ने त्रासले मानिसहरूले बोटल, जर्किनमा समेत इन्धन भरेर लगिरहेका छन्।
तर नेपाल आयल निगमका प्रवक्ता विनितमणी उपाध्यायले सरल र सहज रूपमा इन्धनको आपूर्ति भइरहेकाले उपभोक्तालाई नआत्तिन आग्रह गरेका छन्।
‘इन्धनको आपूर्ति रोकिँदैन। उपभोक्ताले आफ्नो आवश्यकता अनुसार तेल भरे हुन्छ, सञ्चित गरिराख्नु पर्दैन,’ उनले भने।
निषेधाज्ञाको अवधिमा पनि निगमका डिपो र पेट्रोल पम्प खुला रहने उनले जानकारी दिए।
‘कुनै पनि पेट्रोल पम्प तथा डिपो बन्द हुँदैन। हामीले सुरक्षाको मापदण्ड अपनाएर बिक्रीको प्रबन्ध मिलाएको छौं,’ उनले भने।
पेट्रोलियम पदार्थ कुल क्षमताको ८० प्रतिशत बढी मौज्दात रहेको निगमले बताएको छ।
