म्याग्दीको अन्नपूर्ण गाउँपालिकामा निर्माणाधीन १४ मेगावाट क्षमताको घारखोला जलविद्युत आयोजनाको टनेल खन्ने काम सम्पन्न (ब्रेकथ्रु) भएको छ।
आयोजनाको बाँधस्थलदेखि आउटलेटसम्म पानी लैजानका लागि तीन हजार ५०० मिटर लामो टनेलको बुधबार ब्रेकथ्रु भएको हो।
आयोजनाका प्रवर्द्धक, लगानीकर्ता, प्राविधिक लगायतको उपस्थितिमा बुधबार टनेल खन्ने कामलाई पूर्णता दिइएको थियो।
बाँध रहेको अन्नपूर्ण गाउँपालिका–५ शिख र ६ नं वडा घारको सीमा क्षेत्रमा पर्ने कुरिलाबगरबाट एक हजार ६०५ मिटर र आउटलेट रहेको घारको अमिलाकाफलबाट एक हजार ४०० मिटर सुरूङ खनेपछि दुबैतर्फ जोडिएको आयोजनाका आवासीय इञ्जिनियर जोसेफलाल बज्राचार्यले जानकारी दिए।
उनका अनुसार, टनेलको ब्रेकथ्रु भएसँगै आयोजनाको करिब ६२ प्रतिशत काम सम्पन्न भएको छ।
२०७४ चैतबाट निर्माण सुरू भएको यस आयोजनाबाट आगामी असार मसान्तभित्रै विद्युत उत्पादन गर्ने गरी निर्माण कार्यलाई तीव्रता दिइएको छ।
‘निकै लामो सुरूङलाई बीचमा अडिट बिना नै दुई तर्फबाट मात्रै जोडिएको यो नेपालकै पहिलो टनेल हुनसक्छ, भौगोलिक चुनौतीबीच नेपालकै प्राविधिकद्वारा भएको यो महत्वपूर्ण उपलब्धि हो, अब आयोजनाको अन्य पूर्वाधार निर्माणले थप गति पाउँछ’, इञ्जिनियर बज्राचार्यले भने।
आयोजनाको सिभिलतर्फ ६८, हाइडोमेकानिकलतर्फ ५६, इलेक्टोमेकानिकलतर्फ ५० र प्रसारण लाइनतर्फ २० प्रतिशत काम सकिएको छ।
बाँधतर्फ ९८ प्रतिशत काम सकिएको यस आयोजनाको विद्युतगृहतर्फ पेनस्टक पाइप जडान सुरू भएको छ भने विद्युत गृहको पूर्वाधार निर्माण अघि बढेको सिभिल ठेकेदार कम्पनी साउथ एशियन इन्फास्ट्रक्चर प्रालिका आयोजना प्रबन्धक ध्रुब मिश्रले जानकारी दिए।
टनेल खन्ने क्रममा भौगोलिक खालका धेरै समस्या आए पनि त्यसको सामना गर्दै टनेल ब्रेकथ्रु सम्भव भएको उनको भनाइ छ। सुरूङ मार्ग हुँदै ल्याइएको पानीलाई ४८५ मिटर अग्लो हेडबाट एक हजार २०० मिटर पेनस्टक पाइपमार्फत पोखरेबगरमा रहने विद्युत गृहमा खसालेर विद्युत उत्पादन हुने आयोजनाले जनाएको छ।
म्याग्दी हाइड्रोपावर कम्पनी प्रवर्द्धक रहेको यस आयोजनामा नागरिक ऊर्जा बुटवल लिमिटेडले समेत लगानी गरेको छ भने एनएमबि बैंकको नेतृत्वमा एनआइसी एसिया, कुमारी र प्राइम कमर्सियल बैंकले समेत लगानी गरेका छन्।
कूल रु दुई अर्ब ४२ करोड लागत अनुमान गरिएको यस आयोजनामा कोरोनाका कारण आयोजना निर्माणको कामपछि धकेलिएसँगै लागत बढ्ने देखिएको आयोजनाले जनाएको छ।
आगामी माघ मसान्तसम्म सम्पन्न गर्ने लक्ष्य अनुसार निर्माण सुरू भएको यस अयोाजनामा कोरोना लगायतका कारणले निर्माण कार्यमा केही ढिलाइ हुन पुगे पनि आगामी असारसम्ममा आयोजनाको काम सम्पन्न गर्ने गरी निर्माण कार्यलाई तीव्रता दिइएको आयोजनाको परामर्शदाता कम्पनी हाइड्रोकन्सल्ट इञ्जिनियरिङ लिमिटेडका कार्यकारी अधिकृत मनोहर श्रेष्ठले बताए।
उनका अनुसार विद्युत गृह रहने पोखरेबगरदेखि दाना सवस्टेसनसम्मको ८ किलोमिटर लामो ३३ केभिएको डबल सर्किट प्रसारण लाइनको काम समेत अघि बढेको छ।
डिजाइनको काम सकिएको र आवश्यक निर्माण सामग्री अधिकांश कार्यक्षेत्रमा ल्याइसकिएकाले आगामी ४ महिनाभित्रमा प्रसारण लाइनको काम सम्पन्न हुने उनको भनाइ छ।
यस आयोजनामा सिभिलतर्फ साउथ एसियन इन्फास्ट्रक्चर प्रालि, इलेक्ट्रोमेकानिकलतर्फ सिमोर इनर्जी प्रालि, हाइड्रोमेकानिकलतर्फ सिई हाइड्रोमेकानिकल प्रालि, र प्रसारण लाइनतर्फ रोयल कन्स्ट्रक्सन प्रालिले ठेक्का लिएका छन् भने परामर्शदाता कम्पनीमा हाइड्रोकन्सल्ट इञ्जिनियरिङ लिमिटेड रहेको छ। (रासस)
