पूर्वी नाका काँकडभिट्टाबाट कृषिजन्य वस्तु निर्यातभन्दा आयात बढी भएको क्वारेन्टिन कार्यालय काँकडभिट्टाले जनाएको छ।
आर्थिक वर्ष २०७८/७९ मा यो नाका भएर आठ अर्ब ३५ करोड ६५ लाख ८७ हजार रुपैयाँ बराबरको कृषिजन्य सामग्री नेपालबाट भारतलगायत तेस्रो मुलक निर्यात भएको छ। सोही अवधिमा भारतलगायत अन्य मुलुकबाट नौ अर्ब चार करोड ९० लाख ६३ हजारको सामग्री आयात भएको छ।
निर्यातको तुलनामा करिब एक अर्ब रुपैयाँ बढीको सामग्री नेपालतर्फ आयात भएको कार्यालयको तथ्याङ्कले देखाउँछ। कार्यालयका बाली संरक्षण अधिकृत दविन्द्र साहुका अनुसार चामल, धानलगायत खाद्य सामग्री एक अर्ब २१ करोड नौ लाख ४२ हजार, चना, भटमासलगायतका तेलहरू एक अर्ब ३६ करोड ५८ लाख ३४ हजार, करेला, भान्टालगायत ताजा तरकारी १४ करोड ८५ लाख ९२ हजार, ताजा फलफूल ५३ करोड ५२ लाख २४ हजार, इण्डोनेसियन सुपारीलगायत मसलाजन्य सामग्री पाँच अर्ब चार करोड २५ लाख २८ हजार रुपैयाँको आयात भएको छ।
उनले सोही अवधिमा ताजा तरकारी छ करोड ६४ लाख ९५ हजार, सुगनकोकिला, दालचिनीलगायतका जडीबुटी ७० करोड पाँच लाख ३० हजार, मुसुरो दाल ४७ करोड ३२ लाख सात हजार, चिया दुई अर्ब २२ करोड ५६ लाख १५ हजार, अदुवा, अलैँची, वनलसुन चार अर्ब ६६ करोड ३६ लाख दुई हजार, तोरीको पिना, अम्रिसो, चामल ७४ करोड ८३ लाख ८४ हजार गरी जम्मा आठ अर्ब ३५ करोड ६५ लाख ८७ हजार रुपैयाँ बराबरको सामान निर्यात भएको बताए।
