उपत्यकाका मेयरहरुले उपपप्रधान एवम् रक्षा मन्त्री ईश्वर पोखरेललाई नाकामा कडाई गर्न ध्यानाकर्षण गराएका छन्।
पोखरेल कोभिङ–१९ संकट व्यवस्थापन केन्द्र (सिसिएमसी)का संयोजक हुन्। उपत्यका नगरपालिका फोरमका तर्फबाट काठमाडौंका मेयर विद्यासुन्दर शाक्य र मध्यपुर थिमीका मेयर मदनसुन्दर श्रेष्ठले पोखरेललाई भेटेर नाकामा कडाई गर्न माग गरेका हुन्।
'हामीले पहिला उपत्यकाका नाकामा जति कडाई भएको थियो। अहिले पनि त्यति नै कडाई आवश्यक रहेको बतायौँ', मेयर शाक्यले भने, 'वृद्धभत्ताका लागि नवीकरण गर्नुपर्ने मिति सार्न पनि सिफारिस गरेका छौँ।'
त्यस्तै फोरमका तर्फबाट मास्क लगाउने कार्यमा कडाई गर्न समेत सुझाव दिइएको श्रेष्ठले बताए। उनले पिसिआरमा लगानी धेरै भएको तर स्वास्थ्यकर्मी, सुरक्षाकर्मी र क्वारेन्टिन व्यवस्थापनमा ध्यान दिनुपर्ने माग गरे।
साथै काठमाडौं बाहिरबाट विभिन्न कारखानामा आएकालाई कारखाना भित्रै व्यवस्थापन गर्नुपर्ने सुझाइएको उनले बताए।
