भारतका केन्द्रीय राज्य मन्त्री रावसाहब दानवेले भारतीय जनता पार्टी(बिजेपी)ले महाराष्ट्र राज्यमा आगामी दुई-तीन महिनामा आफ्नो सरकार बनाउने दाबी गरेका छन्।
ट्विट गर्दै उनले यस्तो दाबी गरेका हुन्। उनले यसका लागि आफ्नो पार्टीले तयारी गरेको बताए।
महाराष्ट्रमा यतिबेला शिवसेना, एनसिपी र कांग्रेसको गठवन्धन सरकार छ।
विधानसभा चुनावमा शिवसेना र बिजेपीले संयूक्तरूपमा निर्वाचन लडेका थिए र उनीहरूको गठबन्धनले बहुमत प्राप्त गरेको थियो।
तर मुख्यमन्त्री कुन दलको हुने भन्नेमा सहमति नजुटेपछि महिनौंको रस्साकस्सीपछि शिवसेनाले एनसिपी र कांग्रेससँग मिलेर सरकार बनाएको थियो।
त्यसअघि शिवसेनासँग टकराव भएपछि बिजेपीले मंसिर ७ गते एनसिपीसँग रातारात गठबन्धन गर्दै सरकार गठन गरेको थियो।
तर, चार दिन नबित्दै एनसिपीले आफ्नो समर्थन फिर्ता लिदैं शिवसेना र कांग्रेसको गठबन्धनमा सामेल भएपछि बिजेपीका देवेन्द्र फडणाभिसले मुख्यमन्त्री भएको चार दिनमा नै पदबाट राजीनामा दिनुपरेको थियो।
त्यतिबेला पवारको दवावमा एकलौटी निर्णय भएको भन्दै यसका विरुद्ध शिवसेना, एनसिपी र कांग्रेसले सर्वोच्चमा निवेदन दिएका थिए।
निवेदनमा सुनुवाइ गर्दै सर्वोच्चले फडनाविसको सरकारलाई बहुमत देखाउन आदेश दिएको थियो। यत्तिकैमा धेरैको विरोध र तनावपछि एनसिपीका अजित पवारले भाजपाको साथ छोडे। उनले साथ छोडेसँगै भाजपाको सरकार पनि टिक्न सकेन।
ततःपश्चात शिवसेनाका उद्वब ठाकरे मुख्यमन्त्री बनेका थिए।
त्यसपछि पनि बिजेपीले महाराष्ट्रमा आफ्नो सरकार बनाउन भरपुर कोशिस गर्ने अनुमान गरिदैं आइएको थियो।
तर पहिलोपटक कुनै केन्द्रीय मन्त्रीले सरकार गठन हुने दाबी गरेका हुन्।
दानवे जालनाबाट सांसद निर्वाचित भएका हुन् भने मोदीको मन्त्रीमण्डलमा उनी खाद्य तथा सार्वजनिक वितरण राज्यमन्त्री छन्।