पूर्वनिर्वाचन आयुक्त भोजराज पोखरेलले प्राविधिक रुपमा वैशाखमा चुनाव गराउन सम्भव नभएको बताएका छन्।
राजधानीमा आयोजित एक कार्यक्रममा उनले चुनावलाई ‘पोलिटिकल गेम’ भन्दै यसमा राजनीतिक पार्टी भनेको चुनावका खेलाडी भएको बताए। उनीहरू तयार नभए चुनाव गराउन नसकिने पोखरेलले जिकिर गरे।
उनले पहिले पनि राजनीतिक खेलाडी तयार नभएकोले चुनाव गराउन असम्भव भएको बताउँदै उनले भने, ‘यो मुलुकमा चमत्कार हुन्छ र यो चुनाव हुन चमत्कार हुनुपर्छ।’
उनले थपे, ‘नेकपाको विभाजन निरुपण गर्न कम्तीमा ६० दिन लाग्छ, चुनावमा को-को जान्छन् भनेर आह्वान गर्न थप न्यूनतम् २०-२१ दिन लाग्छ।’
उनका अनुसार त्यसपछि दलहरूसँग समानुपातिक नामावली आह्वान गर्न थप २४-२५ दिन लाग्छ र निर्वाचन हुने दिनभन्दा ३० दिनअघि नै मतपत्रको निश्चित निर्णय गर्न सकिएन भन चुनाव गराउन गाह्रो हुन्छ। त्यसैले, निर्वाचन हुन कम्तीमा १३५ दिन लाग्ने उनले बताए।
उनले यो कानुनमा भएको सत्यता भन्दै यी प्राविधिक पक्षको जटिलताको पृष्ठभूमिमा हामीले चुनाव हुन्छ भनेर कसरी पत्याउने? भन्दै प्रश्न गरे।