नेपाली कांग्रेसले प्रधानमन्त्री केपी शर्मा ओलीले प्रधानमन्त्री पदकै गरिमा राख्न असफल भएको निष्कर्ष निकालेको छ।
मंगलबार बसेको केन्द्रीय समिति बैठकको दोस्रो निर्णयमा कांग्रेसले प्रधानमन्त्री ओलीबारे आफ्ना भनाइ प्रष्ट राखेको थियो।
प्रधानमन्त्री ओलीले पछिल्ला समय सार्वजनिक रूपमा व्यक्त गरिरहेका अभिव्यक्तिहरू प्रति पनि कांग्रेसले आफूहरूको ध्यानाकर्षण भएको उल्लेख गरेको छ।
बैठकपछि कांग्रेस मुख्यसचिव कृष्णप्रसाद पौडेलले जारी गरेको विज्ञप्तिमा भनिएको छ, ‘प्रधानमन्त्री केपी शर्मा ओलीले पछिल्लो समय सार्वजनिक रुपमा व्यक्त गरिरहनु भएका अभिव्यक्तिहरुप्रति यो बैठकको ध्यानाकर्षण भएको छ।’
प्रधानमन्त्री ओलीले गत पुस ५ गते प्रतिनिधि सभा विघटन गरेका थिए। उक्त कदम असंवैधानिक भनेको कांग्रेस तेस्रो चरणको आन्दोलनमा छ।
‘संसद विघटनको विरोध गर्नेहरु देश विरोधी हुन् भन्ने उहाँको अभिव्यक्ति अत्यन्तै अनुचित र अलोकतान्त्रिक छ,’ कांग्रेस केन्द्रीय समितिले गरेको निर्णयमा भनिएको छ, ‘सम्मानीत सर्वोच्च अदालतमा जारी बहसलाई तमासाको संज्ञा, वरिष्ठ अधिवक्ताको अपमान, आलोचक पत्रकारहरुप्रति अशोभनीय टिप्पणी अनि आफूसँग अहसमत सबैथरी प्रति उहाँको तिक्त टिप्पणीले प्रधानमन्त्री पदको गरिमा राख्न उहाँ असफल भएको यो बैठकको निष्कर्ष छ।’
यस्तै प्रतिनिधि सभा विघटनविरूद्ध माघ १२ गते काठमाडौंमा नागरिक आन्दोलनमाथि भएको बल प्रयोगलाई कांग्रेसले गम्भीरतापूर्वक लिइएको बताएको छ।
‘संसद विघटन विरुद्ध माघ १२ गते राजधानीमा समाजको विभिन्न क्षेत्रका नागरिकहरुले गरेको प्रदर्शनमा सरकारले बल प्रयोग गरेको घटनालाई बैठकले गम्भीरतापूर्वक लिएको
छ,’ उक्त निर्णयमा भनिएको छ, ‘असंवैधानिक कदम विरुद्धका प्रदर्शनहरु संविधानले प्रदान गरेको अधिकार हो। शान्तिपूर्ण ढंगले गरिएको प्रदर्शनमा लाठी चार्ज, अश्रुग्याँस तथा पानीको फोहरा प्रहार हुँदा घाइते भएका सबै आन्दोलनकारीको शीघ्र स्वास्थ्यलाभको कामना गर्दै यो बैठक सरकारले गरेको बल प्रयोगको घटनाप्रति निन्दा र भत्र्सना गर्दछ।’
कांग्रेसले संसारको दोस्रो अग्लो हिमाल ‘के टु’ को सफल आरोहण गर्ने आरोही निर्मल पुर्जासहित दश नेपाली युवालाई सम्मानसहित वधाइ दिएको छ।