प्रधानमन्त्री केपी शर्मा ओलीले विप्लव समूह र सरकारबीच कुनै समस्या आए छलफल र वार्ताबाट टुंग्याउने बताएका छन्।
‘हामी कुस्ती खेल्दैनौं,’ ओलीले भने।
उनले विप्लव माओवादीले शान्तिपूर्ण बाटोबाट गतिविधि गर्ने र शान्तिपूर्ण ढंगले गर्ने भएपछि नेता कार्यकर्ताहरू प्रक्रिया पूरा गरेर छोड्ने क्रम अघि बढाउने बताए। ‘मुद्दा मामिला छन् भने टुंगिन्छन्, छोड्ने क्रम सुरू भइसकेको छ,’ ओलीले भने।
यसले नेपाललाई नयाँ युगमा प्रवेश गराएको पनि उनले दाबी गरे।
‘हामी हरेक कुरा युग परिवर्तनकारी ढंगले गरेका छौं। गत वर्ष पृथकतावादी आन्दोलन गरिरहेका सीके राउतलाई शान्तिपूर्ण राजनीतिको मूलधारमा ल्यायौं। आज उहाँहरू आइसक्नुभएको छ,’ ओलीले भने।
भाषाहरू मिलाउन पनि समय लाग्ने भएको भन्दै ओलीले भने, ‘जानेरै पनि मैले अंग्रेजी बोलेँ भने अंग्रेजले बोलेको जस्तो हुँदैन। नेपालीले बोलेजस्तो हुन्छ। त्यसैले, भाषा मिलाउन समय लाग्छ।’
ओलीले सेती नदी र त्रिशुली नदी कसरी मिसिएका छन् भन्दै प्रसंग निकाले।
‘सेती नदी र त्रिशूली नदी मिसिएको तपाईंले देख्नुभएको छ। मिसिएको केही भाग एकातिर सेती-सेती, अर्कोतिर त्रिशूली-त्रिशूली देखिन्छ, अलि पर पुगेपछि न त्रिशूली न सेती देखिन्छ। हामी एउटै उद्देश्यमा छौं,’ उनले भने।
