विवेकशील साझा पार्टीले दुइटा हटलाइन नम्बर खुला राखेको बताएको छ।
कोरोना महामारीमा कुनै समस्या परेमा र यसबीचमा कालोबजारी भए सिधा सम्पर्क गर्न दुइटा नम्बर खुला राखिएको पार्टीले जनाएको छ।
कोरोना महामारीका बेला समस्यामा परेका नागरिकहरूलाई सहयोग गर्न हटलाइन सेवा सञ्चालन गरिएको नेता प्रकाशचन्द्र परियारले सेतोपाटीलाई बताए।
‘पार्टीले कोभिड -१९ सँग सम्बन्धित समस्याबारे ९८१३५७७२०७ मा सिधा सम्पर्क गर्न नम्बर तोकेको छ,’ उनले भने, ‘यो नम्बरमा सम्पर्क गरेर आपतमा परेका कोरोना संक्रमित र परिवारले अस्पताल, एम्बुलेन्स, अक्सिजनलगायत बारेमा जानकारी लिन सक्नेछन्।’
हटलाइनमा उपलब्ध हुने स्वयमसेवकहरूले विभिन्न निकाय र संयन्त्रसँग समन्वय गरी समस्या समाधान गर्न सहयोग गर्ने उनले बताए।
साथै पार्टीले कोरोना महामारी र निषेधाज्ञाका बीच पनि कालोबजारी मौलाएका गुनासा आएकोले यसविरूद्ध पनि हटलाइन नम्बर तोकेको छ।
‘कालोबजारीमा आफू परेमा वा कालोबजारी भइरहेको देखेमा ९८६१३३४०५१ नम्बरमा सम्पर्क गर्न सकिन्छ,’ उनले भने। नागरिकका हरेक दु:ख र समस्यामा सहयोग गर्न पार्टीले हटलाइन नम्बर तोकेको नेता परियार बताउँछन्।
उनले यो विचौलियाविरूद्ध सुशासन अभियान भएको पनि जिकीर गरेका छन्। ‘यो सुशासनसाथै खवरदारी अभियान पनि हो,’ उनले भने।
यो हटलाइन सेवा सुरू भइसकेको र यसबीचमा अस्पतालमा शय्या खोज्नेदेखि खाद्यान्नलगायत सहयोग गर्न प्रभावकारी देखिएको पनि उनले बताए।