नेपाली कांग्रेसका सभापतिसमेत रहेका प्रधानमन्त्री शेरबहादुर देउवा नेतृत्वको सरकारलाई सहयोग गर्न गठबन्धनका दलहरूले कार्यदल बनाउने तयारी गरेका छन्।
सरकारले गर्ने कामहरूबारे न्युनतम साझा कार्यक्रम जारी गर्नेदेखि मन्त्रालय बाँडफाँटलगायत विषयमा आपसी छलफल गर्दै सहमतिअनुसार नै अगाडि बढ्न कार्यदल बनाउन लागिएको छ।
कांग्रेस महामन्त्री पूर्णबहादुर खड्काको नेतृत्वमा कार्यदल बनाउने गृहकार्य भइरहेको छ। कांग्रेसका एक जना नेताका अनुसार महामन्त्री खड्काको नेतृत्वमा कार्यदल बनाउनेबारे छलफल भइरहेको छ।
ती नेताका अनुसार सम्भवत आज कार्यदल बन्छ र पहिलो बैठक गर्ने तयारी छ। दलहरूबाट दुई-दुई जना सदस्य राख्ने गरी कार्यदल बनाउन लागिएको छ।
गठबन्धनमा कांग्रेस, नेकपा माओवादी, जनता समाजवादी पार्टीको उपेन्द्र यादव पक्ष, राष्ट्रिय जनमोर्चा छ। नेकपा एमालेका वरिष्ठ नेता माधवकुमार नेपाल पक्ष पनि गठबन्धनमा थिए। तर देउवा प्रधानमन्त्री भएपछि नेता नेपालले आफू गठबन्धनमा रहिरहन नसक्ने पनि बताएका थिए।
कार्यदलमा कांग्रेसबाट केन्द्रीय सदस्यद्वय रमेश लेखक र मिनेन्द्र रिजालको नाम छ। माओवादीबाट वर्षमान पुन र संसदीय दलका उपनेता देव गुरूङको चर्चा छ।
जसपाबाट राजेन्द्र श्रेष्ठ र महेन्द्र राय यादवको नाम कार्यदल सदस्यका लागि आएका छन्। माओवादी केन्द्रको स्थायी कमिटी बैठकमै गठबन्धनबाट साझ न्युनतम कार्यक्रम आउनुपर्ने आवाज उठेको थियो।
गठबन्धनले तय गरेका न्युनतम साझा कार्यक्रम सरकारले संविधान र कानुनअन्तर्गत रहेर कार्यान्वयन गर्ने तयारी छ। प्रधानमन्त्री देउवाले साउन ३ मा विश्वासको मत लिएका थिए। उनलाई नेकपा एमालेका २२ सांसदसहित १६५ जना सांसदले विश्वासको मत दिएका थिए।
प्रधानमन्त्री देउवाले कांग्रेसबाट २ र माओवादीबाट २ जनालाई मन्त्री बनाएका छन्। मन्त्रिमण्डल बिस्तार गर्नेबारे तयारी भइरहेको छ। अब कार्यदलले नै छलफल गरेर कसलाई कुन मन्त्रालय र मन्त्रीहरूबारे नाम पनि तय गर्ने तयारी छ।