नेकपा (एमाले)का उपमहासचिव विष्णु पौडेलले पार्टीभित्र फरक मत नरहेको बताएका छन्।
पार्टीका संगठन विभाग प्रमुखसमेत रहेका उपमहासचिव पौडेलले पार्टी विचार, संगठनसहित सबै हिसाबले एकतावद्ध रहेको दाबीसमेत गरे।
उनले पार्टीको विधान महाधिवेशनमा पार्टीभित्र फरक मत कसैले पनि दर्ज नगरेको स्पष्ट पारे। सोमबार हालै सम्पन्न पार्टीको विधान महाधिवेशनसँग केन्द्रित रहेर न्यूज एजेन्सी नेपालसँग कुरा गर्दै उपमहासचिव पौडेलले पार्टीका अर्का उपमहासचिव घनश्याम भुसालप्रति संकेत गर्दै पार्टीको विधान महाधिवेशनमा औपचारिक रूपले कसैले फरक मत नराखेको प्रतिक्रिया दिए।
‘पार्टीको औपचारिक, आधिकारिक निकायमा, कमिटीमा होला, महाधिवेशनमा होला। ती ठाउँहरूमा व्यक्तिले आफ्नो विचार व्यक्त गर्छ। कमिटीले अथवा अधिवेशनले निर्णय गर्छ। त्यो निर्णयमाथि कसैको असहमति रह्यो भने उसले औपचारिक रूपले बैठकको माइन्यूटमा दर्ज गर्नुपर्छ,’ उनले भने,‘औपचारिक रूपमा दर्ज भयो भने त्यसलाई फरक मत मानिन्छ। कसैले औपचारिक रूपमा फरक मत राखेन भने ऊ पार्टीको निर्णयसँग सहमत भयो भन्ने मानिन्छ। हामीले यो प्रणाली नै विकास गरेका छौं।’
औपचारिक रूपमा माइन्युटमा कसैले मेरो मत यो हो भनेर दर्ज नगर्दासम्म पार्टीमा फरक मत छ भनेर नमानिने पौडेलले तर्क गरे।
‘यस पटक कसैले पनि पार्टीमा फरक मत राखेको होइन। स्थायी कमिटी, केन्द्रीय कमिटी र विधान महाधिवेशनमा विचार त सबैले व्यक्त गर्यौं। सबै ठाउँमा आफूलाई लागेका कुरा बोल्यौं,’ उनले भने, ‘औपचारिक निर्णयसँग भने कोही पनि असहमत भएको र कसैले पनि फरकमत प्रस्तुत गरेको अवस्था होइन। त्यसकारणले पार्टीमा फरक मतको अवस्था नै छैन। पार्टी विचारमा, संगठनमा सबै हिसाबले एकतावद्ध छ।’
उपमहासचिव पौडेलले विधान महाधिवेशनले पार्टी विभाजन नभएको पुनर्पुष्टि गरेको बताए। विधान महाधिवेशनको उपस्थितिले, त्यहाँ भएको छलफलले र रिर्पोटिङपछि पार्टी विभाजन नभएको आफूहरूको निष्कर्ष सही सावित भएको उनको तर्क छ।
एमालेबाट विभाजित भएर नयाँ दल खोलेका माधवकुमार नेपालप्रति संकेत गर्दै पौडेलले स्वार्थवश, कुण्ठावश, इर्ष्यावश केही साथीहरू अलग भएको र भ्रममा परेर पार्टी छोडेकाहरू पुनः फर्किने क्रम सुरू भएको पनि बताए।
पौडेलले एमालेको राष्ट्रिय महाधिवेशन निर्धारित समयमै हुने र त्यसले राष्ट्रिय राजनीतिमा पार्टीको भूमिकालाई अझ बढी प्रभावकारी बनाएर लैजाने विश्वास समेत व्यक्त गरे।
हिजो (आइतबार) सम्पन्न एमालेको विधान महाधिवेशनमा अध्यक्ष केपी शर्मा ओलीले पार्टीको १० औं राष्ट्रिय महाधिवेशन आगामी मंसिर १०, ११ र १२ गते बुटवलमा हुने घोषणा गरेका थिए। उपमहासचिव पौडेलले सो महाधिवेशन तोकिएकै मितिमा सफलतापूर्वक सम्पन्न हुने बताए।
‘महाधिवेशन निर्धारित समयमै हुन्छ। हिजो अध्यक्षले विधान महाधिवेशनको सन्दर्भमा बुटवलमा राष्ट्रिय महाधिवेशन आयोजना हुने कुरा घोषणा गर्नुभएको छ। भव्यतापूर्वक आयोजना हुन्छ। तोकिएकै समयमा आयोजना हुन्छ। सफलतापूर्वक सम्पन्न हुन्छ। त्यसले राष्ट्रिय राजनीतिमा नेकपा (एमाले)को भूमिकालाई अरू बढी प्रभावकारी बनाएर जान्छ,’ पौडेलले भने।
उनले पार्टीको विधान महाधिवेशन पार्टी जीवनमै पहिलो पटक एकमतका साथ सम्पन्न भएको स्पष्ट पारे।
उनले भने, ‘एकता भावका साथ प्रवेश गर्यौं। एकता भावका साथ छलफल गर्यौं। सहमति र सर्वसम्मतिले निर्णय गर्यौं। र एकतावद्ध भएर हल बाहिर निस्कियौं। यो महाधिवेशनको विशिष्ट विशेषता हो भन्ने म ठान्छु। यसले आमजनता र कार्यकर्ताप्रति पार्टीको भरोसा बढाएको छ।’
