नेकपा माओवादी केन्द्रका अध्यक्ष पुष्पकमल दाहालले केही महिनामै माओवादी एक नम्बर पार्टी बन्ने दिशमा रहेको बताएका छन्।
हिमाल, पहाड र तराई-मधेस भ्रमणका क्रममा आफूले माओवादीप्रति जनआकर्षण बढेको देखेको भन्दै दाहालले यस्तो बताएका हुन्।
शनिबार माओवादी केन्द्रको पालिकास्तरको अधिवेशनलाई भर्चुअल रूपमा सम्बोधन गर्दै दाहालले अझ सक्रियता, दृढता र एकढिक्का भएर पार्टी संगठन बनाउने कुरामा चुक्न नहुने बताए।
‘प्रतिक्रियावादीहरू आधारभूत परिवर्तनलाई उल्ट्याउने षडयन्त्रमा लागेका छन्, हामी कमजोर भयौं भने देश र परिवर्तनका एजेन्डा कमजोर हुन्छन्,’ दाहालले भने, ‘तराई-मधेसमा माओवादीमा प्रवेश गर्ने लहर छ, हिमाल पहालमा पनि त्यस्तै छ, अलिकति मेहनत गर्यौं भने एक नम्बर पार्टी बन्छौं।’
दाहालले माओवादीलाई निष्कृय हुन छुट नै नरहेको बताए। उनले देशभर सदस्यता संख्या ८ लाख पुगेको भन्दै एक जनाले तीन वा चार जना मतदाता तयार गर्न सके फेरि देशको नेतृत्व गर्न सकिने बताए।
‘हामी कमजोर भयौं भने राष्ट्रिय एकता कमजोर हुन्छ, देश दुर्घटनामा पर्छ, देशलाई सही दिशामा हाँक्ने हाम्रो काँधमा जिम्मेवारी छ,’ उनले भने।
माओवादी आन्दोलनकै कारण देशमा परिवर्तन भएको भन्दै उनले त्यसको स्वामित्व र अपनत्व आफूहरूले लिनुपर्ने बताए।
उनले पार्टी संगठनलाई बलियो बनाउने, जनतासँगको सम्बन्धलाई उच्च बनाउने कुरामा माओवादीले ध्यान दिनुपर्ने बताए।
उनले त्यसका लागि संशोधनवादी, व्यक्तिगत स्वार्थ र पदीय हित त्याग्नुपर्ने बताए। ‘आफ्ना कमी कमजोरी सच्याउनुपर्छ। निर्मम ढुंगले आत्मसमीक्षा गर्नुपर्छ,’ उनले भने।
उनले हिजोका मुद्दा दह्रोसँग पक्डेर जानुपर्ने बताए। उनले यो महाधिवेशनबाट महिलालाई ३५ प्रतिशत, युवाहरूको २० प्रतिशत, दलित, मधेसी, मुस्लिम, आदिवासी जनजाति समानुपातिक रूपमा सहभागिता बढाइने बताए।