प्रदेश १ का आर्थिक मामिला तथा योजना मन्त्री इन्द्रबहादुर आङ्बोले पहिचानको आधारमा प्रदेश १ को नामाङ्करण गर्न सरकार तयार रहेको बताएका छन्।
शनिबार इलामको माङसेबुङमा किराँत धर्मगुरु आत्मानन्द लिङ्देनको ६८ औं जन्मोत्सव कार्यक्रमलाई सम्बोधन गर्दै मन्त्री आङ्बोले आफू पहिलेदेखि नै किराँत प्रदेशको पक्षमा रहेको उल्लेख गर्दै प्रदेश १ को जनताको चाहनाअनुसार पहिचानको आधारमा नै नामाङ्करण गरिने बताए। उनले भने, ‘यसअघिका प्रदेश सरकारले नगरेका काम यो सरकारले गर्छ।’
‘तत्कालका लागि यो प्रदेशको नाम किराँत नै उपयुक्त हुन्छ,’ मन्त्री आङ्बोले भने, ‘गबन्धन सरकार समेत पहिचानको आधारमा प्रदेश नामाङ्करण गर्न तयार छ। हामी आपसी छलफल र सहमतिमा नाम टुङ्ग्याउँछौं।’
उनले प्रमुख प्रतिपक्षी दलले सरकारदेखि बदलाको भावना नलिई सहयोग गरेमा प्रदेशको नामाङ्करण गर्न सहज हुने समेत बताए।
