नेपाली कांग्रेसका उपसभापति धनराज गुरूङले स्थानीय तहको गत वर्षको बेरूजुको पहाडले सुशासनको मजाक उडाइरहेको बताएका छन्।
सोमबारदेखि ललितपुरको हेरिटेज गार्डेनमा सुरू भएको नेपाली कांग्रेसको प्रशिक्षण कार्यक्रम बोल्दै अहिले पनि जनगुनासो व्यापक रूपले आइरहेकोले पार्टीबाट निर्वाचित जनप्रतिनिधिलाई जनताप्रति पारदर्शी, दवाफदेही हुन उनले आग्रह गरेका छन्।
व्यवस्था बदलिए पनि जनताको अवस्था नबदलिएनको उनले बताए। पात्र बदलिए पनि प्रवृत्ति नबदलिएको उनको भनाइ छ।
सिंहदरबारको अधिकार गाउँ-गाउँमा पुर्याउने कुरा गरे पनि सिंहदरबारको भ्रष्टाचार भने गाउँ-गाउँमा गइरहेको भन्ने जनआवाज उठिरहेको उनले बताए।
‘सिंहदरबारको अधिकार गाउँ-गाउँमा भन्ने प्रश्न उठिरहेका छन्। तर सिंहदरबारको भ्रष्टाचार गाउँ-गाउँमा भन्ने आइरहेको छ’, उनले भने, ‘स्थानीय तहको गत वर्षको बेरूजुको पहाडले पनि सुशासनको मजाक उडाइरहेको छ। सुशासनबिना समुन्नत सम्भव छैन।’
सुशासन बिना समुन्नत सम्भव नभएको भन्दै उनले भने, ‘कार्यकक्षमा पुगेपछि पहिलो शर्त सुशासनलाई अगाडि राखेर काम गर्नुहुन्छ भन्ने विश्वास लिएको छु। सुशासनसँगै पारदर्शिता आवश्यक छ। जनताका लागि खुला किताब बन्न म तपाईंहरूलाई आग्रह गर्न चाहन्छु।’
