नेकपा माओवादी केन्द्रका उपमहासचिव वर्षमान पुनले संघीयताको पहिलो पाँच वर्षको अभ्यास विकास पूर्वाधारलाई क्षेत्रीय स्तरमा पुर्याउन प्रभावकारी बनेको बताएका छन्।
मोरङमा आयोजित कार्यक्रममा सम्बोधन गर्दै पुनले संघीयतापछि नयाँ आर्थिक केन्द्रहरु पनि बन्न थालेको बताए। काठमाडौं केन्द्रित विकास संघयताको कारण प्रदेश र स्थानीय पालिकासम्म विस्तार भएको उनको भनाइ छ।
संघीयताले राजनीतिक नेतृत्व समेत विकास गर्ने उनको तर्क छ। तर केन्द्रमा देखिएका जस्ता विकृति भने अन्त्य हुनुपर्ने उनले बताएका छन्। ‘माथिको विकृति तल लाने होइन। प्रदेशले आफ्नो सामर्थ्य चिन्नुपर्छ,’ पुनले भने,’ ‘संघीयताले राजनीतिक, आर्थिक प्रतिस्पर्धाको वातावरण बनेको छ। ७५३ पालिका आर्थिक केन्द्र पनि हो। मुख्यमन्त्रीले राम्रो काम गरेमा प्रधानमन्त्रीको रुपमा आफूलाई अघि बढाउने सम्भावना हुन्छ भारतमा मोदी गुजरातको मुख्यमन्त्री हुँदै मुलुककै प्रधानमन्त्री भएका हुन्।’
संघको राजनीतिमा रहेका नेता प्रदेशमा र प्रदेशका नेता स्थानीय तहमा गएर निर्वाचन लड्ने विकृति रोकिनुपर्ने उनको धारणा छ। संघीयताकै कारण कर्णालीको आर्थिक वृद्धिदर माथि गएको उनको भनाइ छ।
दुई प्रतिशत हाराहारीमा रहेको कर्णाली प्रदेशको आर्थिक विकास साढे ५ देखि ६ प्रतिशत पुगेको उनले उल्लेख गरे।
प्रारम्भिक चरणमा पूर्वको विराटनगर औद्योगीकरणको हब रहेकामा संघीयताको अभ्यासपछि वीरगञ्ज हुँदै भैरहवा–बुटवल पुगेको र भविष्यमा नेपालगञ्ज हुँदै धनगढीसम्म विस्तार हुने उनको भनाइ छ। संघीयतामा देखिएका विकृत अभ्यास हटाउँदै यसलाई सफल बनाउन सबै केन्द्रित हुनुपर्ने उनले बताएका छन्।