नेकपा एमालेका अध्यक्ष एवम् पूर्व प्रधानमन्त्री केपी शर्मा ओलीले राजनीतिक दलहरूलाई चुनावका हरेक कार्यक्रममा स्वच्छ प्रतिस्पर्धा गर्न आग्रह गरेका छन्।
दसैं, नेपाल सम्वत्, तिहार, छठ लगायतका पर्वको अवसरमा मंगलबार झापाको विर्तामोडमा आयोजित शुभकामना आदानप्रदान कार्यक्रममा उनले अस्वस्थ प्रतिस्पर्धा लोकतान्त्रिक अभ्यास नहुने बताए।
'हामीले लडेर ल्याएको व्यवस्था नै बहुदलीय प्रतिस्पर्धा हो,' उनले भने, 'प्रतिस्पर्धा स्वस्थ भएन भने त्यो लोकतान्त्रिक राजनीति हुँदैन।'
दलहरूबीच राष्ट्रिय एकता र बहुदलीय प्रतिस्पर्धाको गरिमा कायम राख्ने विषयमा राजनीतिक दलबीच एकता हुनुपर्ने उनले बताए।
एमाले अध्यक्ष ओलीले शुभकामना मन्तव्य क्रममा दसैंको सांस्कृतिक, सामाजिक र पौराणिक महत्वका विषयमा चर्चा गर्दै मान्यजनबाट आशीर्वाद ग्रहण गर्ने, नारी शक्तिको उपासना गर्ने र असत्यलाई पराजित गर्ने सन्देश दिने चाड अरू मुलुकमा नभएको बताए।
उनले २०५१ सालदेखि गृहजिल्लामा दसैंको महानवमीको अवसर पारेर शुभकामना आदानप्रदान कार्यक्रम निरन्तर आयोजना गर्दै आएका छन्। अध्यक्ष ओलीले आयोजना गरेको शुभकामना आदानप्रदान कार्यक्रममा राप्रपाका केन्द्रीय अध्यक्ष राजेन्द्र लिङ्देन, माओवादी केन्द्रका केन्द्रीय सदस्य रञ्जित तामाङ लगायतका नेताको सहभागिता थियो।
