जसपा अध्यक्ष उपेन्द्र यादवले गठबन्धनमा तानातान भएकाले निर्वाचन क्षेत्र बाँडफाँटको टुंगो लाग्न नसकेको बताएका छन्।
सेतोपाटीसँग संक्षिप्त कुराकानी गर्दै जसपा अध्यक्ष यादवले बुधबारको बैठकमा कुनै सहमति नभएको दाबी गरे।
'आज पनि हामी बैठक बसेको हो। कुरा मिलेको छैन। हामीले भनेको न्यूनतम सिट दिन गठबन्धनमा रहेका दलहरू तयार भएका छैनन्,' जसपा अध्यक्ष यादवले भने, 'भोलि बैठक बस्ने कि नबस्ने भन्ने टुंगो छैन। बस्ने भएछ भने खबर आउला।'
उनले अहिलेसम्मको वार्ताले सकारात्मक निष्कर्ष निकाल्न नसकेको बताए। आफूहरू अरू दलसँग चुनावी तालमेल गरेर जान खुला रहेको पनि उनले बताए।
जसपाले आफ्नो दललाई कम्तीमा २१ सिट चाहिने अडान लिएको छ। उसले आफूलाई १६ सिटले नपुग्ने स्पष्ट पारेको छ।
