एमाले सुदूरपश्चिम कमिटीका सचिवालय सदस्य र बैतडीको पञ्चेश्वर गाउँपालिकाका अध्यक्ष गोरख चन्दले आफ्नो धारणा सार्वजनिक गरेका छन्।
निर्वाचनमा उम्मेदवारलाई हराउन भूमिका खेलेको भन्दै नेकपा एमाले बैतडीले बुधबार उनलाई पार्टीबाट निष्कासन गर्न र अध्यक्ष पदबाट पनि हटाउन प्रदेश कमिटीलाई सिफारिस गरेको थियो।
पार्टीले गरेको यस्तो निर्णयप्रति अध्यक्ष चन्दले सामाजिक सञ्जाल फेसबुकमार्फत् आफ्ना भनाइ र बैतडीका केही नेताहरूलाई चुनौतीसहित प्रश्न गरेका छन्।
‘पार्टीले निर्वाचनमा अन्तर्घात गरेको भनेर निष्कासन गरेको खबर मिडियामार्फत् जानकारी पाएँ, खासगरी बैतडी (ख) बाट उम्मेदवार भएका लिलाधर भट्ट मेरै कारण हारेको भन्ने आरोप लगाएको रहेछ जबकि मेरो पञ्चेश्वर गाउँपालिकाबाट दुबै उम्मेदवारहरूलाई बहुमत भोटहरू गएको कुरा निर्वाचन आयोगले प्रमाणित गरेको छ। २/४ दिन म लडेर, चोट लागेर अस्पताल आएको र फेरि फर्केर निर्वाचनमा प्रचार प्रसारमा खटिएका कुरा त्यहाँका जनताहरूलाई थाहा नै छ,’ उनले भनेका छन्।
उनले गत पुसमा जिल्लामा भएको अधिवेशनमा आफूले अध्यक्षका लागि चासो राखेको हुँदा साइड लगाउन खोजेको उनको भनाइ छ।
‘मैले जिल्ला अध्यक्षका लागि चासो राखेको थिएँ, त्यहाँबाट मलाई साइड लगाउन खोज्दै थिए, स्थानीय तह निर्वाचनमा मेरो दोहोरिने मन थिएन, जबर्जस्ती टिकट दियो फेरि, त्यहीँ लिलाधर भट्टले हाम्रै पार्टीका राजेन्द्र चन्दलाई बागी उम्मेदवार बनाएर पठायो, यसका बाबजुद पञ्चेश्वरका जनताले अत्यधिक मतले विजय गराए,’ उनले फेसबुकमा भनेका छन्।
उनले सुदूरपश्चिममा एमालेका मात्र नभई अन्य पार्टीका पनि धेरै उम्मेदवारले निर्वाचनमा पराजय भोगेको बताएका छन्।
निर्वाचनमा पराजय भोगेकाहरूलाई पार्टीका मान्छे अन्तर्घात गरेर यसको भएको भन्न नमिल्ने उनले लेखेका छन्।
‘हार/जीत त निर्वाचनमा यो निरन्तर चलिरहने प्रक्रिया हो मन लागेको उम्मेदवार र पार्टी छान्ने जनताको अधिकार हो। लोकतान्त्रिक प्रणालीमा जीत-हारलाई सामान्य रूपले लिनुपर्छ। यसैपालि पनि हाम्रा ठूलाठूला नेताहरू हारेका छन् उनीहरूले कसलाई कारबाही गर्ने जनतालाई?’, उनले प्रश्न गरेका छन्, ‘जहाँसम्म मेरो कारबाहीको विषय छ त्यो एक्लै ममाथि कारबाही भएको होइन स्वराडका लाखौं–लाख जनतामाथिको कारबाही भएको हो।’
उनले नेकपा एमाले बैतडी दुई चार जनाको पेवा नभएको बताएका छन्।
‘हजारौं-हजार मान्छेले दु:ख–कष्ट जेलनेल गरेर पार्टी यहाँसम्म आइपुगेको हो। २०६२/६३ सालको जनआन्दोलनमा कता हुनुहुन्थ्यो? अहिलेका कम्पनीवाला कता जागिर गर्दै हुनुहुन्थ्यो? खैर आज धेरै कुरा नलेखौं यो पार्टीसँगको लडाइँ होइन पार्टीप्रति मेरो उच्च सम्मान छ किनभने यो पार्टी निर्माणका लागि तपाईंहरूभन्दा बढी रगत पसिना जनताहहरूले बगाएका छन्। हामीले जनमतको कदर गर्नुपर्छ, त्यसको निम्ति मेरो लडाइँ जारिरहने छ। पार्टीमा रहँदा वा नरहँदा हामी स्वराडका जनतामाथि गरेको अन्याय अत्याचार विभेदका विरूद्ध आफ्नो अडानबाट पछि हट्ने छैनौं’, उनले लेखेका छन्।
उनले आफ्नो क्षेत्रका विकासका लागि लडिरहने लेखेका छन्।