नेपाल भ्रमणमा रहेकी अमेरिकाकी उपविदेश मन्त्री भिक्टोरिया न्युल्यान्डले सोमबार उच्चस्तरीय राजनीतिक भेटवार्ता गरेकी छन्।
आइतबार साँझ काठमाडौं ओर्लिएकी न्युल्यान्डले सोमबार बालुवाटारमा प्रधानमन्त्री पुष्पकमल दाहाल ‘प्रचण्ड’ सँग भेटवार्ता गरेकी थिइन्। त्यसलगत्तै उनले धुम्बाराही पुगेर नेपाली कांग्रेसका सभापति शेरबहादुर देउवासँग भेट गरेकी थिइन्। देउवालाई भेटपछि न्युल्यान्ड नेकपा (एमाले) का अध्यक्ष केपी शर्मा ओलीलाई भेट्न उनको निवास बालकोट पुगेकी थिइन्।
न्युल्यान्डले परराष्ट्र मन्त्री विमला राई पौड्यालसँग पनि भेटवार्ता गरेकी छन्। राजनीतिक भेटवार्तापछि सोमबार दिउँसो न्युल्यान्डले पत्रकार सम्मेलन गरेकी थिइन्।
पुष्पकमल दाहाल ‘प्रचण्ड’ को नेतृत्वमा नयाँ सरकार बनेपछि नेपाल भ्रमण गर्ने उनी पहिलो उच्च अमेरिकी अधिकारी हुन्। अमेरिकी विदेश मन्त्रालयमा राजनीतिक मामिलासम्बन्धी उप विदेशमन्त्री रहेकी न्युल्यान्डले अमेरिकी कूटनीतिक क्षेत्रमा तीन दशक बिताएकी छन्।
पाटनमा भएको पत्रकार सम्मेलनमा बोल्दै न्युल्यान्ड नेपाली नेताहरूसँगको भेटवार्तामा आफूले चार वटा कुरा राखेको बताइन्।
‘मैले आज काठमाडौंमा महत्वपूर्ण भेटघाट गरें। ती भेटघाटमा नेपाल-अमेरिका सम्बन्धका विविध विषयमा कुरा भए,’ न्युल्यान्डले भनिन्,‘विशेष गरी मैले चार वटा विषयमा कुरा गरें।’
न्युल्यान्डका अनुसार भेटवार्ताका क्रममा अमेरिकी सहयोग परियोजनाहरूमा अर्को कदमबारे कुरा भएको थियो। एमसिसी पारदर्शी र नेपाली जनताको हितमा भएकाले यसको कार्यान्वयन महत्वपूर्ण उनले बताइन्।
‘नेपाल दुई ठूला छिमेकीबीच अवस्थित मुलुक हो। र यी दुबै मुलुकमध्ये भारतसँग अमेरिकाका सुमधुर सम्बन्ध छ। चीनसँगको सम्बन्ध सुधारमा पनि बाइडेन प्रशासन लागिरहेको छ,’ उनले भनिन्,‘यी दुई ठूला मुलुकसँगको भूराजनीतिभन्दा पनि हामी नेपालले आफ्नो हितका विषयमा सार्वभौम निर्णय गरोस् भन्ने चाहन्छौं।’
त्यस्तै ती भेटहरूमा संक्रमणकालीन न्यायसम्बन्धी विधेयकबारे पनि छलफल भएको थियो।
नेपालमा अमेरिकी लगानी मैत्री वातावरण बनाउनेबारे पनि भेटमा कुरा भएको थियो।
‘धेरै अमेरिकीहरू नेपालमा लगानी गर्न इच्छुक छन्। यहाँ उनीहरूलाई लगानी मैत्री वातावरण कसरी बनाउन सकिन्छ भन्नेबारे पनि हामीले छलफल गर्यौं,’ उनले भनिन्।
उपविदेश मन्त्री न्युल्यान्डले भ्रष्टाचारविरूद्धको लडाइँलाई प्रभावकारी बनाउने विषयमा कुराकानी भएको बताइन्।
‘अमेरिका र नेपालमा पनि भ्रष्टाचारविरूद्धको लडाइँ महत्वपूर्ण छ। त्यसमा हामी कसरी सहकार्य गर्नसक्छौं भन्नेबारे कुराकानी भयो,’ उनले भनिन्।
नेपाल र अमेरिका दुबै प्रजातान्त्रिक मुलुक भएकाले दुई देशको सम्बन्ध आगामी दिनमा झन् प्रगाढ हुने उनले विश्वास व्यक्त गरिन्।
तीन दशक अमेरिकी कूटनीतिज्ञका रूपमा बिताएकी न्युल्यान्डले काठमाडौंका भेटघाटहरू निकै सकारात्मक भएको बताइन्।