नेकपा माओवादी केन्द्रको स्थायी कमिटी बैठकले राष्ट्रपतिको निर्वाचनमा सहमती गरी अघि बढ्ने निर्णय गरेको छ।
शनिबार पेरिसडाँडास्थित पार्टी कार्यालयमा बसेको बैठकले उक्त निर्णय गरेको माओवादी केन्द्रका सचिव देवेन्द्र पौडेलले बताए।
‘दुई महिनाभित्र राष्ट्रपति-उपराष्ट्रपतिको चुनाव हुन्छ। त्यसमा सकेसम्म सहमतिको प्रयत्न गर्ने, सहमति हुन नसकेमा जोसँग विचार, दृष्टिकोण, उद्देश्य, लक्ष्य मिल्छ त्यसैसँग मिलेर जानेगरी हाम्रो बैठक सकेको छ,’ उनले भने।
यसरी मिलेर जाँदा कुनै पनि पार्टीसँग दूरी नबढ्ने पनि उनले दाबी गरे।
‘एमालेसँग दूरी बढ्ने प्रश्नै छैन। एमालेलाई बाहिर राखेर, बाइपास गरेर, केही नयाँ गर्न खोजेकै छैनौं। उहाँहरूसँगै सहमति गरौं भनेका हौं नी। एमाले-कांग्रेस जस्ता पार्टीसँग मिलेर सहमति गरेर जाऔं, संविधानको रक्षा गरौं। संविधानलाई अगाडि बढाऔं भन्दा एमालेलाई चिढ्याउनुपर्ने केही कारण छैन,’ उनले भने।
यस्तै पार्टीले दुई महिना फिल्डमा जाने पनि निर्णय गरेको छ। यसरी फिल्डमा जाँदा पार्टी पंक्तिका नेताहरूलाई मात्रै नभई जनतासँग भेट्ने उनले बताए।
प्रकाशित मिति: शनिबार, माघ २१, २०७९, १६:५६:४४
