दाङको दंगीशरण गाउँपालिकाले आइतबार परेको थारु समुदायको महत्वपूर्ण पर्व अट्वारीको अवसरमा सार्वजिक बिदा दिएको छ।
गाउँपालिका उपाध्यक्ष पीमा खड्काले थारु जातिको महान् पर्व अट्वारीको अवसरमा सार्वजनिक बिदा दिने निर्णय भएको जानकारी दिइन्।
शुक्रबार बसेको कार्यपालिकाको बैठकले सार्वजनिक बिदा दिने निर्णय गरेको उपाध्यक्ष खड्काले बताइन्।
जिल्लाका दस स्थानीय तहमध्ये हालसम्म दंगीशरण गाउँपालिकाले मात्रै थारु समुदायको अट्वारी पर्वमा सार्वजनिक बिदाको घोषणा गरेको छ।
दंगीशरण गाउँपालिकासँग सीमाना नजिक तुलसीपुर उपमहानगरपालिकाले भने अट्वारीको अवसरमा शैक्षिक संस्थाहरूमा मात्रै बिदा दिएको छ।
आज भन्दा झन्डै २७ सय वर्ष पहिले थारु राजा दंगीशरणले राजकाज चलाएको सुकौराकोट दरबार भने तुलसीपुरमा पर्ने गर्छ।
थारु समुदायको बाहुल्यता रहेको दाङमा अट्वारी पर्वलाई उनीहरू धूमधामपूर्वक मनाउने गर्छन्।