रुपन्देहीको बुटवलमा मोटरसाइकलको ठक्करबाट एक जना मृत्यु भएको छ। बुटवल उपमहानगरपालिका वडा नं. २ गढिटोलस्थित भित्री सडकखण्डमा सोमबार राति मोटरसाइकलको ठक्करबाट पैदलयात्रीको मृत्यु भएको प्रहरीले जनाएको छ।
इलाका प्रहरी कार्यालय बुटवलका अनुसार सोमबार राति साढे १० बजेतिर लु. २१ प. ३८१२ नं. को मोटरसाइकलले ठक्कर दिँदा गढिटोल निवासी ४५ वर्षीय सुरेन्द्र केशरीको मृत्यु भएको हो।
मोटरसाइकलको ठक्करबाट गम्भीर घाइते भएका केशरीको लुम्बिनी प्रादेशिक अस्पताल बुटवलमा उपचारको क्रममा राती पौने १२ बजे मृत्यु भएको इलाका प्रहरी कार्यालय बुटवलका प्रहरी निरीक्षक नविन चुंदालीले जानकारी दिए।
पैदलयात्रीलाई ठक्कर दिने मोटरसाइकल र चालक फरार छन्।
यता कुलोमा डुबेर रुपन्देहीको तिलोत्तमामा एक बालकको मृत्यु भएको छ।
सोमबार दिउँसो सवा ४ बजेतिर तिलोत्तमा नगरपालिका वडा नं. ५ मणिग्रामका ४ वर्षीय बालकको कुलोमा डुबेर मृत्यु भएको हो।
पर्वत घर भई मणिग्राममा तीन चार वर्षदेखि बस्दै आएका किशन परियारको ४ वर्षीय छोरा खेल्दै गर्दा बस्दै आएको घर अगाडिको कुलोमा खसेका थिए।
कुलोमा खसेपछि करिब ७ सय मिटर तल बग्दै गरेका बालकलाई स्थानीयले उद्धार गरी अस्पतालमा लगेकोमा अस्पतालले मृत घोषणा गरेको प्रहरीले जनाएको छ।
