धनुषामा कोरोनाको जस्तै लक्षण देखिएका एक पुरुषको मृत्यु भएको छ। मिथिला विहारी नगरपालिका वडा नम्बर ५ घर रहेका ती पुरुषमा केही दिन यतादेखि रुघाखोकीकाे समस्या रहेकोमा आज उनको मृत्यु भएको धनुषाका प्रमुख जिल्ला अधिकारी प्रेमप्रसाद भट्टराईले जानकारी दिए।
उनको शव व्यवस्थापनका नेपाली सेनाको टोली त्यहाँ पुग्न लागेको प्रमुख जिल्ला अधिकारी भट्टराईले बताए। उनी विगत ५ महिना देखि धनुषाकै विनयतारा फाउण्डेशनमा सेक्युरिटी गार्डको रुपमा काम गर्दै आएका थिए।
उनलाई गत ५ दिनदेखि रुखाखोकी, टाउकाे दुख्ने समस्या रहेको मिथिला विहारी नगरपालिका वडा नम्बर ५का वडाध्यक्ष विनोद मण्डलले बताए।
मण्डलका अनुसार उनी दैनिक आफ्नो गाउँ ललियाबाट कामका लागि जनकपुरधाम आवत जावत गर्दै आएका थिए। यद्यपि आफू अस्वस्थ रहेको कुरो कसैलाई नबताएको वडाध्यक्ष मण्डलले बताए।
यता मृतकको शव अहिले पनि विनयतारा फाउण्डेशनमै रहेको छ। भट्टराईका अनुसार मृतकको स्वाब संकलनको तयारी भइरहेको छ। स्वाब संकलन पछि शवको व्यवस्थापनको प्रकृया अगाडि बढाइने प्रमुख जिल्ला अधिकारी भट्टराईले बताए।