रुपन्देहीको सैनामैना नगरपालिका झारबैराका ८६ वर्षीय गोले दङ्गोरिया थारु आइतबार लालपूर्जा पाएपछि खुसी देखिन्थे।
साढे आठ दशक पुरा गरिसक्दा बल्ल आफूले खनजोत गरेको जग्गाको स्वामित्व पाउँदा उनको मुहार खुसी देखिन्थ्यो।
गाउँव्लकमा रहेको उक्त जग्गाको लालपुर्जाको लागि गोलेले धेरै पटक मालपोत र नगरपालिकाको ढोका चहारेका थिए।
‘लालपूर्जा नपाई मरिन्छ कि भन्ने लागेको थियो, अहिले लालपुर्जा पाइयो अब त मरेपनि जग्गाको मालिक भएर मर्न पाइने भयो’ खुसी हुँदै उनले भने।
गाउँव्लकको समस्याका कारण पुस्तौदेखि बसोबास गर्दै आए पनि लालपुर्जा पाउन नसकेका जग्गाधनीलाई सैनामैना नगरपालिकाले आइतबार वितरण गरेको हो। आइतबार १ सय ८८ जनाको लालपुर्जा वितरण कार्यक्रममा नगरपालिकाले गोले दङ्गोरिया थारुलाई पहिलो हस्तान्तरण गर्दै शुभारम्भ गरेको थियो।
साविक पर्रोहा वडा नं. १ को कित्ता नं. ५५ को लालपूर्जा बुझेका रामकृपाल थारुले अब बैंकमा धितो राखेर भएपनि केही काम गर्न सकिने भन्दै खुसी व्यक्त गरे। रामकृपालको ४४० दशमलव ३८ हेक्टर क्षेत्रफल जग्गा रहेपनि लालपूर्जा नहुँदा बैंकिङ कारोबारका लागि प्रयोग गर्न सकेका थिएनन्। ‘वर्षौदेखिको प्रयास बल्ल सफल भयो, अब बैंकमा धितो राखेर पनि ऋण निकाल्न पाइने भइयो’ उनले भने।
एकैघरका दाजुभाई सोफु कठरीया थारु र नाथु प्रसाद कठरीया थारुले भने संयुक्त लालपुर्जा पाएका छन्। नगरपालिकाले साविक पर्रोहा र सालझण्डी गाविस अन्तर्गत रहेका गाउँ ब्लकका झारबैरा, रन्यौरा, उछडीहवा, लेडुवा, पानवारी, दक्षिण दोगराका समुदायमा रहेका १ सय ८८ जनालाई लालपुर्जा वितरण गरेको हो।
नगरपालिकाका प्रमुख चित्रबहादुर कार्कीले वर्षौदेखि खनजोत र भोगचलन गर्दै आएका जग्गाधनीलाई लालपुर्जा वितरण गरिएको बताए। उनले गतवर्ष पनि करिब ५ सय जग्गाधनीलाई लालपुर्जा वितरण गरिएको उल्लेख गर्दै साविक दुधराक्ष गाविसका वडाहरुमा अझै पनि वितरण गर्न बाँकी रहेको बताए। ‘यो वर्ष दुधराक्षका गाउँ ब्लकको नापजाँच र स्रेस्ता तयार गरी आउने असार मसान्त भित्र नै पुर्जा वितरण कार्यलाई अगाडि बढाउने छौं’ उनले भने।
