रुपन्देहीको तिलोत्तमा नगरपालिकाभित्र बसोबास गर्ने व्यक्तिको कोरोना संक्रमणबाट मृत्यु भएमा नगरपालिका आफैंले शव व्यवस्थापन गर्ने निर्णय गरेको छ।
कार्यवाहक नगरप्रमुख जगेश्वरदेवी चौधरीको अध्यक्षतामा मंगलबार बिहान बसेको कोभिड संकट व्यवस्थापन केन्द्र (सिसिएमसी) को नगर बैठकले कोरोना संक्रमणबाट मृत्यु भएका नगरबासीको शव व्यवस्थापन नगरपालिका आफैंले गर्ने निर्णय गरेको हो।
यसअघि शव व्यवस्थापनको काम सम्बन्धित पालिकाको सहयोगमा नेपाली सेनाले गर्दै आएको थियो।
यसअघि संघीय सरकारले होम-आइसोलेसनमा बसेका संक्रमितको शव सम्बन्धित परिवारले नै व्यवस्थापन गर्ने निर्णय गरेको थियो। त्यसलगत्तै तिलोत्तमा नगरपालिकाले आफ्ना नााागरको शव व्यवस्थापनको जिम्मेवारी आफूले लिने निर्णय लिएको हो।
बैठकले शव व्यवस्थापनको आवश्यक तयारी गर्न स्वास्थ्य शाखालाई जिम्मेवारी दिएको छ। तिलोत्तमामा मंगलबारसम्म कोरोना संक्रमणबाट ८ जनाको मृत्यु भएको छ।
हालसम्म तिलोत्तमाका ७ सय २६ जनालाई कोरोना संक्रमण भएकोमा ३ सय ९३ जना निको भइसकेका छन्। ३ सय २५ जना भने सक्रिय संक्रमित छन्।
बैठकले कन्ट्याक्ट ट्रेसिङमा परेका नगरबासीको पहिलो पटकको परीक्षण समेत नगरपालिका आफैंले निःशुल्क गर्ने निर्णय गरेको छ।
संक्रमितको कन्ट्याक्ट ट्रेसिङमा परेर लक्षण देखिएकाहरूको नगरपालिकाको खर्चमा पिसिआर परीक्षण गर्न सरकारी प्रयोगशालासँग सम्झौता गर्ने निर्णय बैठकले गरेको हो।
संघीय सरकारले सबैको पिसिआर परीक्षण समेत निःशुल्क नगर्ने निर्णय सार्वजनिक गरिरहँदा तिलोत्तमा नगर सरकारले त्यसको जिम्मेवारी समेत आफैंले लिने निर्णय गरेको हो।
त्यस्तै, हाल ४० बेड क्षमता रहेको आइसोलेसनको क्षमता समेत बढाउने निर्णय गरेको कार्यवाहक नगरप्रमुख चौधरीले जानकारी दिइन्।
हाल तिलोत्तमाको आइसोलेसनमा अन्य पालिकाबाट जाँच भई आएका २२ जना संक्रमित रहेको नगरपालिकाका प्रवक्ता सुरेन्द्र श्रीले जानकारी दिए।
