बालिकाअपहरणको आरोपमा ललितपुरबाट तीन जना पक्राउ परेका छन्। ।
सोमबार राति सवा १० बजे ललितपुर महानगरपालिका-२९ हरिसिद्धीबाट तीन जनालाई पक्राउ गरिएको महानगरीय प्रहरी परिसर ललितपुरले जनाएको छ।
पक्राउ पर्नेमा सर्लाही हरिवन नगरपालिका-८ बासटोल घर भइ हरिसिद्दी बस्ने ३० वर्षीय राजु कार्की, काभ्रे नमोबुद्ध नगरपालिका-८ बुझाकोटका २३ वर्षीया सिता परियार र धनुषा धारापानी गाँउपालिका-२ का ४० वर्षीय कृष्ण तोलामी छन्।
परिसरका प्रवक्ता डिएसपी सन्तोष तामाङका अनुसार यस घटनाका मुख्य अभियुक्त राजु कार्की हुन्। उनीहरूले सोमबार राति साढे ७ बजे महालक्ष्मी नगरपालिका-४ मनकामना चोक बस्ने एक बालिकाको अपहरण गरेका थिए।
बारा सिम्रौनगढ नगरपालिका-१ घर भई हाल मनकामना चोक बस्ने गुड्डी साहकी ८ वर्षीया छोरी अनुखा साहलाई अपहरण गरेको डिएसपी तामाङले बताए। आफ्नो कोठाबाहिर खेलिरहेको बेलामा साइकल चढेर आएका राजु कार्कीको टोलीले अनुखा साहलाई अपहरण गरी लगेका थिए।
त्यस समयमा अपहरण गर्ने व्यक्तिहरू को थिए भन्ने पत्ता लगाएका थिएनन्। प्रहरीले खबर पाएपछि महानगरीय प्रहरी वृत्त, सातदोबाटोबाट डिएसपी मित्रबन्धु शर्माको नेतृत्वमा टोली खटिएको थियो। प्रहरीले यसमा प्राविधिकसहितको टोली खटाएको थियो।
खोजी गर्ने क्रममा प्रहरीले बालिकालाई हरिसिद्धिस्थित सीता परियारको कोठामा बन्धक बनाएर राखेको अवस्थामा फेला पारेको हो। ती बालिकाको सकुशल उद्दार गरेको शर्माले बताए।
उनीहरूले फिरौती माग्नकै लागि अपहरण गरेको अनुमान नगरेको डिएसपी शर्माले बताए। ‘घटनामा जे पनि हुन सक्थ्यो। बालिकालाई बाहिर बेच्न पनि लग्न सक्थ्यो वा बलात्कार पनि गर्न सक्थ्यो,’ शर्माले भने।
अपहरणकारीहरूले प्रहरीसमक्ष बालिकालाई खाना खुवाउन लगेको बताएका छन्। ‘बालिकालाई खाना खुवाउन लगेको कुरा बताएका छन् जुन विश्वासयोग्य छैन,’ उनले भने, ‘अर्काको बच्चा त्यसरी ल्याएर फोन बन्द गर्ने, फोन उठाएर पनि आफ्नो ठाउँ गलत बताएको पायौं।’
फोन गर्दा प्रहरीलाई नै ‘को होस् तँ’ भनेर आफ्नो फोन बन्द गरेको डिएसपी शर्माले बताए। त्यसपछि प्रहरीले प्राविधिक टोलीको सहयोगमा उनीहरूको ठेगाना पत्ता लगाएर बालिकाको उद्धार गरेको हो। उनीहरूमाथि प्रहरीले थप अनुसन्धान अघि बढाएको छ।
