आपराधिक लाभ लिएको कसुरमा पक्राउ परेका विराटनगरका मिटरब्याजी एजाज शेख अहमद अदालतबाट धरौटीमा छुटेका छन्।
आइतबार न्यायाधीश रोशनकुमार भट्टराईको इजलासले अहमदलाई पाँच लाख धरौटीमा छोड्न आदेश दिएको हो।
श्रेष्तेदार राजकुमार दाहालका अनुसार उनी धरौटी बुझाएर आइतबार नै रिहा भएका छन्।
उनीविरूद्ध एक करोड १० लाख रुपैयाँ आपराधिक लाभ लिन खोजेको कसुरको अनुसन्धान प्रतिवेदन थियो।
सरकारी वकिलको कार्यालयले एजाजसहित अन्य तीन जनाविरूद्ध मोरङ अदालतमा शुक्रबार ‘अपराधिक लाभ लिएको’ मुद्दा दर्ता गरेको थियो।
विराटनगरका-९ का ३५ वर्षीय तनवीर खान, सोही ठाउँका ३५ वर्षीय युसुफ भनिने फकिरा शेख र ३२ वर्षीय सावन दास फरार छन्।
विराटनगर-१५ रानीका रामकृष्ण ठाकुरसँग मिटरब्याजको रकम असुल्न एजाजले खोजेका थिए।
रकम असुल्ने योजनामा उनले अपहरण शैलीमा ठाकुरलाई दिनभर विराटनगर घुमाएर दुई वटा (५० र ६०)लाख रुपैयाँका चेक बनाएका थिए।
ठाकुरले एजाजबाट एक वर्षअघि १५ लाख रुपैयाँ ब्याजमा लिएका थिए। त्यसको मिटरब्याज उठाउन दुई वटा चेकबाट एजाजले १ करोड १० लाख रुपैयाँ असुल्न खोजेका थिए।
एजाज मिटरब्याज धन्दामा कहलिएका व्यक्ति रहेको प्रहरीको भनाइ छ। उनले विराटनगर कार्यक्षेत्र बनाएर मिटरब्याज लगानी गर्ने, मिटरब्याज लगानीको पैसा उठाउन व्यक्तिहरूलाई नियन्त्रणमा लिएर यातना दिने गरेको प्रहरी बताउँछन्।
उनी छुटेपछि प्रहरीले सम्पत्ति शुद्धीकरण प्रयोजनार्थ सम्पत्ति शुद्धीकरण अनुसन्धान विभागमा लेखी पठाउने तयारी गरिरहेको मोरङका प्रहरी उपरीक्षक सन्तोष खड्काले बताए।
यो पनि हेर्नुहोस्
‘मिटरब्याजको रकम असुल्न फनफनी विराटनगर घुमाएर १ करोड १० लाख असुल्ने चेक बनाए’
विराटनगरका अर्का मिटरब्याजी एजाज पक्राउ
