सुर्खेतको बुलबुले तालबाट फसेको अवस्थामा उद्दार गरिएको जरायोको मृत्यु भएको छ।
आइतबार बिहान उद्दारपछि उक्त जरायोलाई डिभिजन वन कार्यालय वीरेन्द्रनगरमा राखेर उपचार गरिएको थियो। उपचारकै क्रममा सोमबार अपराह्न जरायो मरेको हो।
मृत जरायोलाई सोमबार नै डिभिजन वन कार्यालयको परिसरमा गाडिएको छ। जरायोको शरीरमा टाउकोसहित तीन ठाउँमा चोट लागेको थियो।
बुलबुले तालमा आइतबार रातिदेखि नै जरायो फसेको अनुमान गरिएको छ।
तालमा जरायो फसेको देखेपछि स्थानीयले डिभिजन वनको टोलीलाई खबर गरेका थिए। उक्त जरायो दक्षिणतर्फ रहेको काँक्रेबिहार संरक्षित क्षेत्रबाट आएको हुनसक्ने अनुमान गरिएको छ। काँक्रेबिहार जरायोको बासस्थान पनि हो।
डिभिजन वन कार्यालय वीरेन्द्रनगरका वन अधिकृत टेक रावलका अनुसार करिब ३ वर्षको जरायोको तालबाट उद्दार गरिएपछि कार्यालयमै राखेर उपचार गर्ने काम भइरहेको थियो।
उनका अनुसार तार बारमा ठोक्किएर घाउ भएको हुनसक्ने अनुमान गरिएको छ।