आवश्यक खोपको जोहो हुन नसकेपछि सरकारले जेष्ठ नागरिकले खोप पाउने उमेर समूह परिवर्तन गरेको छ।
फागुन २३ गतेदेखि ५५ वर्ष माथिका जेष्ठ नागरिकलाई खोप दिइने भनिएकोमा अहिले उक्त उमेर समूह बढाएर ६५ वर्ष पुर्याइएको छ।
स्वास्थ्य सेवा विभाग अन्तर्गत खोप शाखा प्रमुख डा. झलक शर्मा गौतमका अनुसार आगामी आइतबारदेखि सुरू हुने खोप अभियानमा ६५ वर्ष माथिका जेष्ठ नागरिकले नजिकको खोप केन्द्रमा गएर खोप लगाउन सक्छन्। गौतमले खोपको उपलब्धता कम भएपछि उमेर समूह बढाउनुपरेको जनाए।
उनले अहिले १५ लाख खोप उपलब्ध रहेको र पुरानै योजना अनुसार ५५ वर्ष माथिकालाई खोप दिन कम्तिमा ४० लाख खोप आवश्यक पर्ने बताए।
गौतमले ६५ वर्षदेखि माथिका उमेर समूहका मानिस करिब १७ लाख रहेको र उपलब्ध भएको खोपले करिब १५ लाख जनालाई दिन सकिने जनाए।
उनले थप खोप आएपछि ५५ वर्षदेखि ६४ वर्ष उमेर समूहका मानिसहरूलाई खोप दिइने बताए। तर उक्त खोप कहिले आइपुग्छ भन्ने यकिन नरहेको गौतम बताउँछन्।
'दश लाख खोप आउँनै बाँकी छ। कोभ्याक्स कार्यक्रम अन्तर्गतको साढे तीन लाख खोप पनि चाडै आउँदैछ। खोप आउनसाथ तुरुन्तै हामी बाँकी उमेर समूहलाई खोप दिन्छौं,' उनले भने।