झापाको भद्रपुर नगरपालिकासहित हल्दिबारी, कचनकबल र बाह्रदशी गाउँपालिकाका सामुदायिक विद्यालयमा 'एन्ड्रोइड बोर्ड' जडान गर्दै पठनपाठन थालिएको छ।
संघीय सांसद राजेन्द्रकुमार लिङ्देनले संसद क्षेत्र विकास कोषबाट रकम उपलब्ध गराएपछि चार वटा पालिकाका सामुदायिक विद्यालयमा एन्ड्रोइड बोर्ड राखेर पठनपाठन गराउन थालिएको हो।
विद्यालयलाई प्रविधिमैत्री बनाई शिक्षाको गुणस्तरमाथि उठाउने उद्देश्यले सांसद क्षेत्र विकास कोष अन्तर्गत झापा क्षेत्र नं. ३ का १२ वटा सामुदायिक विद्यालयमा एन्ड्रोइड बोर्ड तथा प्रोजेक्टर प्रदान गरिएको हो।
बाह्रदशी गाउँपालिका–७ स्थित गौरीशंकर माध्यमिक विद्यालयमा एन्ड्रोइड बोर्ड तथा प्रोजेक्टर प्रयोगसम्बन्धी एकदिने अभिमुखीकरण कार्यक्रमलाई सम्बोधन गर्दै सांसद लिङ्देनले सूचना प्रविधिमार्फत् विद्यालयको शैक्षिक गुणस्तर अभिवृद्धिका लागि आफूले विद्यालयलाई एन्ड्रोइड बोर्ड उपलब्ध गराएको बताए।
यसैबीच गौरीशंकर माविमा राखिएका पाँच वटा बोर्डको सांसद लिङ्देनले उद्घाटन गरेका थिए।
सो अवसरमा बोल्दै बाह्रदशी गाउँपालिका अध्यक्ष खड्गप्रसाद राजवंशीले सामुदायिक विद्यालयको शैक्षिक गुणस्तर सुधार्न प्रविधिले सहयोग पुर्याएको बताएका छन्। उनले विद्यालय नजाने विद्यार्थी पनि अहिले प्रविधिको माध्यमबाट पठनपाठन गराउन थालेपछि सामुदायिक विद्यालय आउने विद्यार्थीको संख्या बढेको बताए।
‘हिजो विद्यार्थी खोज्न घर–घर जानुपथ्र्यो तर अहिले विद्यार्थी आफैं विद्यालय आउन थालेका छन्। निजी विद्यालयको तुलनामा शैक्षिक गुणस्तर अझ राम्रो हुँदै गएपछि विद्यार्थी तथा अभिभावकको रुची सामुदायिकतर्फ तानिएको हो,’अध्यक्ष राजवंशीले भने।
‘सामुदायिक विद्यालयमा अध्ययन गर्ने विद्यार्थीका लागि सबै सुविधा छन्,’ अध्यक्ष राजवंशीले भने,‘पढ्ने किताब किन्नु पर्दैन, कपी पेन्सिल पनि विद्यालयले नै दिन्छ, विद्यालय पोशाक विद्यालयले नै दिन्छ, अहिले त अझ खाजाको पनि व्यवस्था छ। तर, त्यही विद्यार्थी निजी विद्यालय गए पढाइ खर्चको कुरा त परैको हो। आफ्नो बच्चा पुर्याउन, खाजा खान र लिन अभिभावक तीन पटक विद्यालय जानुपर्छ।’
‘वर्षमा एक पटक पनि आफ्ना बालबालिका अध्ययन गर्ने विद्यालय नआउने अभिभावकका नानीलाई हामीले शिक्षा दिनुपर्छ,’ अध्यक्ष राजवंशीले थप भने, ‘यस्तो बिजोककाबीच पनि अब सामुदायिक विद्यालयका विद्यार्थी सक्षम र पढाइमा तेजिला भएर निस्कँदैछन्। किनकी सबै विद्यालयमा अहिले मल्टिमिडियाद्वारा पठनपाठन हुन्छ।’
