शंकर ग्यास उद्योग प्रा.लि.ले भैरहवामा अक्सिजन लिक्वीडको प्लान्ट निर्माण गर्ने भएको छ।
आइतबार उक्त प्लान्टको प्रधानमन्त्री केपी ओलीले भर्चुअल रूपमा शिलान्यास गर्ने भएका छन्।
नेपालमा पहिलोपटक शंकर ग्यासले लिक्वीड अक्सिजनको प्लान्ट निर्माण गर्न लागेको हो।
प्लान्ट दैनिक ६० टन क्षमताको निर्माण गर्न लागिएको सञ्चालक शंकर अग्रवालले बताए।
यो भनेको दैनिक सात हजार सिलिण्डरजति अक्सिजन हो।
नेपालमा दोस्रो लहरको कोरोना संक्रमण सुरू भएपछि अक्सिजनको हाहाकार भएको थियो। त्यो हाहाकार टार्न शंकर ग्यास उद्योगले भारतबाट ल्याएर लिक्वीड अक्सिजन ट्यांक जोड्न थालेको थियो।
‘प्लान्ट नै चाहिँ नेपालमा पहिलोपटक स्थापना गर्न लागिएको हो,’ अग्रवालले भने।
लिक्वीड अक्सिजन प्लान्टमा प्रयोग हुने ट्यांक ल्याइसकिएको उनले बताए।
‘एक वर्षभित्र प्लान्ट जडान गरी सञ्चालनमा ल्याइने छ,’ अग्रवालले भने, ‘यसपछि नेपालमा जडान भएका लिक्वीड अक्सिजनमा फालाफाल ग्यास पाइने छ।’
शंकर ग्यासले बिपी कोइराला स्वास्थ्य विज्ञान प्रतिष्ठान, भेरी अस्पताल, कोहलपुर मेडिकल कलेज, टेकु अस्पताल, टिचिङ अस्पताल र ट्रमा सेन्टरमा लिक्वीड अक्सिजन जोडिसकेको छ।
काठमाडौंको ग्रीनसिटी अस्पताल, भरतपुर क्यान्सर अस्पताल र युनिभर्सल मेडिकल कलेज भैरहवामा लिक्वीड जडान भइरहेको छ।
प्लान्ट निर्माण भएपछि ट्यांकमार्फत् सरकारलाई अक्सिजन ग्यास उपलब्ध गराइने उनले बताए। एउटा ट्यांकमा १२ सय क्युमेक मिटर ग्यास हुन्छ।
एउटा सिलिण्डरमा सात क्युमेक मिटर ग्यास हुन्छ।
अहिले प्रतिसिलिण्डर ५, ६ देखि ११ सय रूपैयाँमा अक्सिजन पाइने गरिएको छ। यो प्लान्ट सञ्चालनमा आएपछि एक सिलिण्डर बराबरको सात क्युमेक अक्सिजन २८० रूपैयाँमै उपलब्ध गराइने अग्रवालले बताए।
यस्तै, शंकर ग्रासले लिक्वीड नाइट्रोजन ग्यास प्लान्ट पनि जडान गर्ने भएको छ। गाईं, भैंसी तथा कुखुराको प्रजनन प्रणालीका लागि उक्त ग्यास आश्यक पर्छ। दैनिक १० टन क्षमताको लिक्वीड नाइट्रोजन प्लान्ट पनि सँगसँगै सञ्चालनमा ल्याइने अग्रवालले बताए।
यो पनि हेर्नुहोस्
टेकु, वीर अस्पतालको अक्सिजन समस्या हल गर्ने शंकर ग्यास