हिजोआज सामाजिक सञ्जाल फेसबुक, ट्वीटर र टिकटकमा ज्ञानेन्द्र शाहीको समूहमाथि कुटपिट भएको भिडिओ भाइरल छ।
सुर्खेतको वीरेन्द्रनगर नगरपालिका वडा नम्बर १३ करे खोलामा शाहीसहित उनको समूहमाथि शुक्रबार बेलुकी करिब ११ बजेतिर कुटपिट भएको थियो।
शाहीका समूहका केही व्यक्तिको टाउकोमा चोट लागेको छ। भिडिओमा शाही रूँदै आफ्ना साथीहरूलाई अंगालो मारेका छन् र अस्पताल लैजान भनिरहेको सुनिन्छ। यो घटनामा शाही समूहका पाँच जना घाइते छन्।
उनीहरू गम्भीर घाइते नभएको र सबैको उपचार भइसकेको जिल्ला प्रहरी कार्यालय सुर्खेतका प्रमुख प्रहरी उपरीक्षक राजेन्द्रप्रसाद भट्टले सेतोपाटीलाई बताए।
तर शाहीले भने आफूहरूमाथि ज्यान मार्ने गरी हमला भएको दाबी गरेका छन्।
'आफ्नो ज्यान नै माया मारी म कोभिडबाट लाखौं नागरिक बचाउन लागिरहँदा पनि आफ्नो ज्यान बचाउन सकिएन। सतीले सरापेको देश हो भन्थे, हो रहेछ। अब त यो देशमा नै बस्न मन लागेन,' उनले भनेका छन्, 'मध्य राति सुर्खेतमा हामीमाथि ज्यान मार्ने हमला भयो। ज्यान बालबाल बच्यो। धन्यबाद भगवान। धन्यबाद शुभचिन्तक।'
यस घटनामा संलग्न रहेको आरोपमा प्रहरीले पाँच जनालाई पक्राउ गरेको छ। सुर्खेतका सुजन सारू मगर, ललित गहा, टंक सलामी, घनश्याम सलामी र नवराज गिरीलाई नियन्त्रणमा लिएर थप अनुसन्धान भइरहेको प्रहरीले जानकारी दिएको छ।
उनीहरू पाँचै जना घर तथा बाटो बनाउने कामदार रहेको प्रहरीको भनाइ छ। तर शाहीले भने आफूहरूमाथि सरकार पक्षबाटै योजनावद्ध तवरले आक्रमण भएको आरोप लगाएका छन्। यसबारे प्रहरीले पनि सत्यतथ्य छानबिन नगरेर झुठ बोल्ने गरेको आरोप शाहीको छ।
तर शाहीको समूहमाथि कुटपिटमा अहिलेसम्म जाहेरी परेको छैन। प्रहरीका अनुसार सामान्य उजुरी परे पनि जाहेरी आएको छैन।
शुक्रबार शाही नेतृत्वको समूहलाई कुटपिट भएको घटनालाई प्रहरीले झडप भनेको छ।
'यो सामान्य झगडा हो। उहाँहरूले यसलाई ठूलो बनाउनु भयो,' एसपी भट्टले भने, 'पक्राउ परेकाहरू सबै घर/बाटो बनाउने मजदुर हो। कुनै राजनीतिक पृष्ठभूमिका देखिँदैन। प्रतिशोध लिन, ज्यान मार्नलाई सुनियोजित तरिकाले घटना घटाएकोजस्तो पनि देखिँदैन।’
यो घटना शुक्रबार राति भएको थियो। ज्ञानेन्द्र शाहीको समूह खाना खाएर निस्किएका थिए। प्रहरीका अनुसार केहीले मादक पदार्थ सेवन पनि गरेको पाइएको छ।
'उहाँहरू कुखुरा पालेको ठाउँमा बस्नु भएको रहेछ। त्यहाँ नै कुखुरा काटेर खाएर करिब ११ बजेको आसपासमा गाडी र मोटरसाइकलमा फर्कनुभएको रहेछ,' एसपी भट्टले भने, 'त्यो बेला बाटोमा स्थानीय युवा पनि हिँडिरहेका रहेछन्। ती युवामध्ये केहीले मापसे गरेको देखिन्छ। मोटरसाइकलमा सवार व्यक्तिले अपशब्द बोलेपछि स्थानीय युवाले मोटरसाइकल रोकेर के बोलेको भनेर सोधेछन्। त्यही क्रममा मोटरसाइकलमा सवार व्यक्तिले स्थानीय युवा नवराज गिरीमाथि हेलमेटले प्रहार गरेको देखिन्छ।'
यसपछि स्थानीय युवा र ज्ञानेन्द्र शाही समूहबीच झडप भएको प्रहरीको भनाइ छ। झडप भएपछि उक्त ठाउँमा स्थानीय बासिन्दाहरू पनि भेला भएका थिए। ‘मोटरसाइकलमा सवार भएकाहरू त्यसपछि भागेको देखिन्छ,’ उनले भने।
केहीबेरमा पछिपछि आइरहेको ज्ञानेन्द्र शाहीको गाडी पनि स्थानीयले रोकेका थिए। लगत्तै स्थानीय युवाले गाडीका चालकमाथि कुटपिट गरेका थिए। प्रहरीले झडपको घटना केही पछि मात्रै थाहा पाएको थियो। करिब साढे ११ बजे शाही समूहको प्रहरीले उद्धार गरेको एसपी भट्टले बताए।
प्रहरीले आफ्नो गाडीमा राखेर शाहीको समूहलाई उद्धार गरी अस्पताल पुर्याएको थियो। ‘उहाँहरूको गाडी पनि त्यहाँबाट निकाल्यौं,’ भट्टले भने, ‘कुटपिट गर्ने समूहलाई स्थानीयले ल्याउन दिएनन्। थप प्रहरी पठाएर ल्याएका हौं।’ प्रहरीले यो घटनाबारे थप अनुसन्धान गरिरहेको जनाएको छ।